Qańtardaǵy búlik: qaza tapqan 33 adamnyń denesi qaita qazylyp alynǵan
Osydan eki ai buryn ǵana shańyraq kótergen 22 jastaǵy Ańsar 5-shi qańtarda Almatydaǵy oqiǵa kezinde qaza tapqan. Shymkent qalasynda jer qoinyna tapsyrǵan múrdeni qaita qazyp alý jóninde sot sheshim shyǵarǵan. Al onsyz da balasynan aiyrylyp, qaiǵydan qan jutqan ata-anasy sottyń mundai sheshimimen kelispei, joǵarǵy sotqa aryz jazyp, molany kúzetýmen júr.
Marqumnyń anasy Jazira Jandarbekova 7-qańtardan bastap búgingi kúnge deiin mazaratty ańdýmen júremin deidi.
“Balamnyń Ańsar ulymnyń basynda krediti bar. Ne isteimin, kimnen kómek suraimyn”, – deidi ol.
Almaty oblysyndaǵy Jambyl aýdanyna qarasty Aqseńgir aýylynyń turǵyny 21 jastaǵy Oljas Álimjanuly da Almatyda 5-shi qańtar kúni qaza tapty. Onyń da etjaqyndary eksgýmatsiia jasatýǵa jol bermeimiz dep otyr. Al bul sýrettegi Marat Musabekov 5-shi qańtar kúni Almatyda jumystan qaityp kele jatqanda oq tiip, qaza tapqan. Uly ákesiniń denesin jer qoinyna tapsyrǵannan soń 11 kúnnen keiin quqyq qorǵaý organdary múrdeni qarsylyqqa qaramastan qaita qazyp aldy deidi.
Marqumnyń uly Sultan Musabekov eksgýmatsiia kúshtep júrgizildi dep otyr.
“Qazirgi ýaqytta bizge saraptama qorytyndysy aqpan aiynyń sońynda daiyn bolatynyn aitty”, – deidi ol.
Al bas prokýratýra jer qoinynan denesi qaita qazyp alynyp, eksgýmatsiia jasalyp jatqan marqumdar kúdikti emes ekenin jetkizdi. Qaitys bolǵan adamdardyń denesi qylmystyq iste kúdikti retinde tanylǵandyqtan qaita qazylyp alynyp jatqan joq.
Qaitys bolý sebepteri men mán-jailaryn anyqtaý maqsatynda tekserýler men saraptamalar júrgizý qajettigine qaramastan, týystary alyp ketken marqumdardyń denelerine ǵana eksgýmatsiia jasalady. Al balalaryn jer qoinyna bir ai buryn tapsyryp, qara jamylǵan otbasylar eksgýmatsiiany toqtatyp, árýaqtarǵa tynyshtyq bersin deidi.
https://www.youtube.com/watch?v=jP1ouH1d31o&list=PLn2OyECVOtB-Zjv3hPIiC7f-IewZeXYKZ&index=10
