Rejisser, Almaty qalalyq máslihatynyń depýtaty Erkin Raqyshev Qazaqstannyń búgingi jaǵdaiyna kimder kináli ekenin aitty, - dep habarlaidy Dalanews.kz.
Depýtattyń sózinshe, Nazarbaevtyń bailyǵy 200 milliard dollardan asyp jyǵylady degen derekter bar.
"Bizdiń memleket júie durys bolmaǵanynan damymady. Múmkin basynda Nazarbaev durys bastaǵan da shyǵar. "Aqsha kórip perishte joldan taiady" deidi ǵoi. Munyń Nazarbaevqa qatysy joq. Bul aqsha kórmegen ǵoi. Sodan keiin aqshany kórdi de "ala bereiin, ala bereiin" degen.
Keibir derekterge qaraǵanda, "Nazarbaevtyń 200 milliard dollardan asa aqshasy bar" deidi. Kim ekonomikany biledi, olar túsinedi. Odan kóp bolmasa, kem emes. Ony ne isteidi?! Ana jaqqa alyp ketpeidi ǵoi. Ishtarlyq, teksizdik. Ata-babalary bailyqty, dáýletti kórgen adamdardyń urpaǵy olai jasamaidy. Ekonomikanyń bárin bir otbasynyń, bilikke jaqyn júrgen oligarhtardyń múddesin qorǵaityn qylyp jasady. Nátijesinde osyndai taqyr kedei bolyp otyrmyz. Qazba bailyqtarymyzǵa, jalpy bailyqtarymyzǵa qaraǵanda jáne halyqtyń sanymen salystyrǵanda álemdegi eń bai memlekettiń biri biz bolýymyz kerek edi. Ókinishke orai, eń kedei memleketterdiń arasyndamyz.
Sebebi bizdiń júie, ekonomika durys emes. Búgingi ekonomikany salystyrmaly túrde aitatyn bolsaq, jolsyz jermen qarańǵyda júrip kele jatqan kólikke uqsaidy. Ol mashinanyń ne róli joq, ne jaryǵy joq, biraq júrgizýshi ekeý: bireý gazdy bassa, ekinshisi tejegishti basyp otyr. Bizdiń búgingi ekonomikany solai deýge bolady. Arǵy jaqynda jarqyn bolashaq bar ma? Joq. Myna túrimizben jol apatyna ushyraimyz. Memleket bolyp qalýymyz ekitalai. ...Búgingi halyqaralyq jaǵdaiǵa, basqa da faktorlarǵa qarasaq, qazaq ultyn joiýǵa baǵyttalǵan saiasat júrip jatyr", - dedi Raqyshev "Ashyq podkastqa".
Erkin Raqyshev Qańtar oqiǵasyna eski Qazaqstannyń qandai qatysy bar ekenin de aitty.
"Qańtar gaz qymbattaýyna qatysty halyqtyń narazylyǵynan keiin shyqty. Olar tek gazǵa narazy emes, jalpy qymbatshylyqqa, zańsyzdyqqa, kedeilikke, bilikke degen qarsylyǵynan shyqty. Jer-jerde halyq kóterilip, sodan shyqty. Bir kezde qolynan bilik sýsyp ketip bara jatqanyn túsingen eski Qazaqstannyń ókilderi muny qalai da ózderiniń adamdary ielenip qalsyn dep ózderiniń adamdaryn kirgizdi. Arandatýshylar bar, basqalar bar. Endi mynadai másele týyndaidy: Qańtar qaitalanýy múmkin be? Eger Úkimet qańtarda týyndaǵan problemalardy sheshkende, Qańtar qaitalanbaityn edi. Onyń bireýi de sheshilgen joq qoi. Sol kedeishilik. Sol qymbatshylyq", - dedi depýtat.
Sonymen qatar, ol aktivterdi shetel asyrǵandardy, halyqtyń bailyǵyna qol salǵandardy túrmege toǵytý kerek degen pikirde.
"Halyqty bilikke sendiretin jol bar. Men de Toqaevqa sener edim. Toqaev halyqqa bet buramyn dep urlanǵan aqshalardy qaitaramyn dep, urlaǵandardyń bárin túrmege otyrǵyzsa, urlanǵan aqshany qaitarsa, halyqtyń jaǵdaiyn jasasa, búkil zańdy halyqtyń múddesin qorǵaityndai etip jasasa, sol kúni Toqaevty qoldaityn edim. Nazarbaevty túrmege otyrǵyzyp qoisynshy, sol kúni qoldaimyn", - deidi ol.
