رەجيسسەر، الماتى قالالىق ءماسليحاتىنىڭ دەپۋتاتى ەركىن راقىشيەۆ قازاقستاننىڭ بۇگىنگى جاعدايىنا كىمدەر كىنالى ەكەنىن ايتتى، - دەپ حابارلايدى Dalanews.kz.
دەپۋتاتتىڭ سوزىنشە، نازاربايەۆتىڭ بايلىعى 200 ميلليارد دوللاردان اسىپ جىعىلادى دەگەن دەرەكتەر بار.
"ءبىزدىڭ مەملەكەت جۇيە دۇرىس بولماعانىنان دامىمادى. مۇمكىن باسىندا نازاربايەۆ دۇرىس باستاعان دا شىعار. "اقشا كورىپ پەرىشتە جولدان تايادى" دەيدى عوي. مۇنىڭ نازاربايەۆقا قاتىسى جوق. بۇل اقشا كورمەگەن عوي. سودان كەيىن اقشانى كوردى دە "الا بەرەيىن، الا بەرەيىن" دەگەن.
كەيبىر دەرەكتەرگە قاراعاندا، "نازاربايەۆتىڭ 200 ميلليارد دوللاردان اسا اقشاسى بار" دەيدى. كىم ەكونوميكانى بىلەدى، ولار تۇسىنەدى. ودان كوپ بولماسا، كەم ەمەس. ونى نە ىستەيدى؟! انا جاققا الىپ كەتپەيدى عوي. ءىشتارلىق، تەكسىزدىك. اتا-بابالارى بايلىقتى، داۋلەتتى كورگەن ادامداردىڭ ۇرپاعى ولاي جاسامايدى. ەكونوميكانىڭ ءبارىن ءبىر وتباسىنىڭ، بيلىككە جاقىن جۇرگەن وليگارحتاردىڭ مۇددەسىن قورعايتىن قىلىپ جاسادى. ناتيجەسىندە وسىنداي تاقىر كەدەي بولىپ وتىرمىز. قازبا بايلىقتارىمىزعا، جالپى بايلىقتارىمىزعا قاراعاندا جانە حالىقتىڭ سانىمەن سالىستىرعاندا الەمدەگى ەڭ باي مەملەكەتتىڭ ءبىرى ءبىز بولۋىمىز كەرەك ەدى. وكىنىشكە وراي، ەڭ كەدەي مەملەكەتتەردىڭ اراسىندامىز.
سەبەبى ءبىزدىڭ جۇيە، ەكونوميكا دۇرىس ەمەس. بۇگىنگى ەكونوميكانى سالىستىرمالى تۇردە ايتاتىن بولساق، جولسىز جەرمەن قاراڭعىدا ءجۇرىپ كەلە جاتقان كولىككە ۇقسايدى. ول ماشينانىڭ نە ءرولى جوق، نە جارىعى جوق، ءبىراق جۇرگىزۋشى ەكەۋ: بىرەۋ گازدى باسسا، ەكىنشىسى تەجەگىشتى باسىپ وتىر. ءبىزدىڭ بۇگىنگى ەكونوميكانى سولاي دەۋگە بولادى. ارعى جاقىندا جارقىن بولاشاق بار ما؟ جوق. مىنا تۇرىمىزبەن جول اپاتىنا ۇشىرايمىز. مەملەكەت بولىپ قالۋىمىز ەكىتالاي. ...بۇگىنگى حالىقارالىق جاعدايعا، باسقا دا فاكتورلارعا قاراساق، قازاق ۇلتىن جويۋعا باعىتتالعان ساياسات ءجۇرىپ جاتىر"، - دەدى راقىشيەۆ "اشىق پودكاستقا".
ەركىن راقىشيەۆ قاڭتار وقيعاسىنا ەسكى قازاقستاننىڭ قانداي قاتىسى بار ەكەنىن دە ايتتى.
"قاڭتار گاز قىمباتتاۋىنا قاتىستى حالىقتىڭ نارازىلىعىنان كەيىن شىقتى. ولار تەك گازعا نارازى ەمەس، جالپى قىمباتشىلىققا، زاڭسىزدىققا، كەدەيلىككە، بيلىككە دەگەن قارسىلىعىنان شىقتى. جەر-جەردە حالىق كوتەرىلىپ، سودان شىقتى. ءبىر كەزدە قولىنان بيلىك سۋسىپ كەتىپ بارا جاتقانىن تۇسىنگەن ەسكى قازاقستاننىڭ وكىلدەرى مۇنى قالاي دا وزدەرىنىڭ ادامدارى يەلەنىپ قالسىن دەپ وزدەرىنىڭ ادامدارىن كىرگىزدى. ارانداتۋشىلار بار، باسقالار بار. ەندى مىناداي ماسەلە تۋىندايدى: قاڭتار قايتالانۋى مۇمكىن بە؟ ەگەر ۇكىمەت قاڭتاردا تۋىنداعان پروبلەمالاردى شەشكەندە، قاڭتار قايتالانبايتىن ەدى. ونىڭ بىرەۋى دە شەشىلگەن جوق قوي. سول كەدەيشىلىك. سول قىمباتشىلىق"، - دەدى دەپۋتات.
سونىمەن قاتار، ول اكتيۆتەردى شەتەل اسىرعانداردى، حالىقتىڭ بايلىعىنا قول سالعانداردى تۇرمەگە توعىتۋ كەرەك دەگەن پىكىردە.
"حالىقتى بيلىككە سەندىرەتىن جول بار. مەن دە توقايەۆقا سەنەر ەدىم. توقايەۆ حالىققا بەت بۇرامىن دەپ ۇرلانعان اقشالاردى قايتارامىن دەپ، ۇرلاعانداردىڭ ءبارىن تۇرمەگە وتىرعىزسا، ۇرلانعان اقشانى قايتارسا، حالىقتىڭ جاعدايىن جاساسا، بۇكىل زاڭدى حالىقتىڭ مۇددەسىن قورعايتىنداي ەتىپ جاساسا، سول كۇنى توقايەۆتى قولدايتىن ەدىم. نازاربايەۆتى تۇرمەگە وتىرعىزىپ قويسىنشى، سول كۇنى قولدايمىن"، - دەيدى ول.
