Jaqynda Qańtar oqiǵasy kezinde Ishki ister ministrligin basqarǵan Erlan Turǵymbaev ustaldy. Al Bas prokýratýra 2022 jylǵy qańtardaǵy oqiǵalarǵa bailanysty qylmystyq isterdi áli de tergep jatqanyn jariia etti. Sarapshylar Qańtar shyndyǵy 2 jylda qanshalyq ashyldy degen saýalǵa jaýap berdi, - dep habarlaidy Dalanews.kz.
Májilis depýtaty Aidos Sarymnyń pikirinshe, bul oqiǵaǵa qatysty shyndyq áli de ashyla túsedi.
"Qańtar shyndyǵy áli ashylǵan joq, ashyla túsedi. Qańtar oqiǵasyna deiin bir jyl buryn AQSh-ta májilisti jaýlap alý áreketi bolǵan edi. Mysal úshin sonyń sottary áli júrip jatyr. Trampqa áli kúnge deiin aiyp taǵylaiyn dep jatyr. Erte me, kesh pe, sol sottyń bolatyny anyq. Sol siiaqty tutqynǵa túsken adamdar ýaqyt óte jan-jaǵyn oilana bastaidy. Olarmen tergeýshilerdiń jumystary jalǵasyp jatady. "Shynymdy aitsam, men kináli emespin, maǵan mynadai tapsyrma kelip edi" degendei qosymsha aqparat berýi múmkin. Advokattary bar, aǵaiyn-týysy bar, adam qapasqa túsken soń "nege men ǵana jaýap berýim kerek, nege mynalar jaýap bermeidi" dep neshe túrlini oilaidy ǵoi.
Meniń oiymsha, áli tolyqqandy shyndyǵyn ashyp bitken joqpyz, oǵan da ýaqyt kerek. Biraq osyndai oqiǵalardyń, osyndai faktilerdiń túpkilikti úlken jiyntyǵy úlken bir shyndyqty ashady", - dedi ol "Halyq únine".
Depýtat Abzal Quspan da Qańtarǵa qatysty tergeýler birneshe jylǵa sozylady degen pikirde.
"Qańtar shyndyǵy ashyldy dep aitqan da durys emes. Qańtarǵa qatysty laýazym ieleriniń barlyǵy ustalyp boldy dep aitý da shyndyqqa sáikes kelmeidi. Oǵan naqty bir mysal keltireiin. Qańtarǵa qatysty 5500-den asa qylmystyq is tirkeldi, al sotqa ketken qylmystyq isterdiń sany 500-diń tóńireginde ǵana. Iaǵni barlyq qylmystyq istiń on paiyzyna da jetpeidi.
Sondyqtan, birinshiden, Turǵymbaevpen shektelmeidi. Ekinshiden, Qańtar shyndyǵy tolyq ashyldy dep aitýǵa bolmaidy. Bul - áli birneshe jylǵa sozylýy múmkin jaǵdai. Kem degende 238 adam kóz jumdy dep otyrmyz. 1 qylmystyq isti ashý keide birneshe jylǵa sozylatyn jaǵdailar bolady. Barlyǵynyń núktesin qoiý úshin óte kóp ýaqyt kerek bolady. Áli birneshe jylǵa sozylsa da tańǵalmaimyn", - dedi depýtat.
Al depýtat Jarqynbek Amantaidyń sózinshe, shendi qyzmette otyrǵandardyń arasynda Qańtarǵa qatysy barlar tabylýy da múmkin.
"Qańtar oqiǵasy bir kúnde daiyndalǵan dúnie emes qoi. Sondyqtan onyń ashylýyna da ýaqyt kerek bolady. Jasyryn, kóleńkede, shymyldyqtyń artynda turyp áreket jasaǵandar da bar. Sondyqtan onyń bárin aiqyndaý bir kúnniń, bir jyldyń sharýasy dep oilamaimyn. Ýaqyt ótken saiyn ashyla túsedi. Onyń ústine áli de biliktiń tarmaqtarynda dál osy oqiǵalarǵa qatysty adamdardyń bolýy yqtimal", - dedi Májilis depýtaty.
Májilis depýtaty Edil Jańbyrshin Turǵymbaevtyń ustalýy jańa adamdardyń ustalýyna da áser etýi múmkin ekenin málimdedi.
"Qylmysty zertteý, bolǵan oqiǵalardy tergeý kezinde jańa figýralar paida bolýy múmkin. Sondyqtan oǵan tańǵalýdyń qajeti joq dep oilaimyn. Sebebi Qańtar oqiǵasy kezinde bul kisi ishki ister ministri boldy ǵoi. Jańa faktiler paida bolýy múmkin. Jańa materialdar paida bolýy múmkin. Erteń ol kisini tergegen kezde basqa figýralar shyǵýy múmkin", - dedi ol.
Al depýtat Ermurat Bapi Turǵymbaevtyń aiyby nede ekenin túsindirip berdi.
"Turǵymbaev Qańtar oqiǵasynyń kindigi emes, biraq belgili bir jaýapty tulǵa dep esepteimin. Sebebi Qańtar oqiǵasy kezinde oblystyq politsiia departamentteriniń barlyǵy ózderiniń jumys oryndaryn tastap ketip qalýy - úlken qylmys. Olardyń ketip qalýyna komanda bergen - Turǵymbaev. Osy turǵydan ol sol kezdiń ózinde jazaǵa tartylýy kerek edi. Biraq kesh bolsa da ony qamaýǵa alý Qańtarǵa qatysty ádilettiliktiń úlken bir belgisi dep oilaimyn. Biraq Qańtardyń máselesi munymen bitken joq. Qańtardyń máselesi Qazaqstanda uzaqqa sozylatyn protsess bolady dep oilaimyn", - dedi saiasatker.
Aita keteiik, 29 sáýirde aýyr zardaptarǵa ákep soqqan bilik pen laýazymdyq ókilettigin asyra paidalanǵany úshin (Qylmystyq kodekstiń 362-baby 4-bóligi) burynǵy ishki ister ministri Erlan Turǵymbaev ustalǵan bolatyn.
"Qylmystyq iste memlekettik qupiia málimetter bolýyna bailanysty sotaldy tergep-tekserýdiń basqa derekteri jariialanbaidy", - dedi prokýratýra ókilderi.
Al Astana qalasynyń mamandandyrylǵan tergeý soty 30 sáýirde burynǵy ishki ister ministri Turǵymbaevqa qatysty eki ai merzimge "kúzetpen ustaý" túrindegi bultartpaý sharasyn sanktsiialady.
