Aqtóbede qaraqshylyq shabýyldan aman qalǵan qyzǵa der kezinde qol ushyn sozbaǵan qutqarýshyǵa qatysty sot úkimi shyqty. Tótenshe jaǵdailar departamentiniń qyzmetkeri Abylaihan Berjanov óz jumysyna salǵyrt qaraǵany úshin alty ai emin-erkin júrip tura almaidy, dep habarlaidy Dalanews.kz KTK arnasyna siltep.
Osydan on ai buryn tún jarymynda 112 qutqarý qyzmetine 13 jastaǵy Sofiia habarlasqan. Bailanys birneshe ret úzilip ketipti. Keiin telefon tutqasyn kótergen kezekshiniń kómekshisine jasóspirim pyshaq jaraqatyn alǵanyn, anasy men baýyryn qylmysker óltirip ketkenin aitady. Biraq oǵan Abylaihan Berjanov ilana qoimapty. Kerisinshe, balaǵa "oinamai, tynysh otyrýyn" suraidy. Qansyraǵan jasóspirim osy aralyqta talyp qalǵan. Esin qaita jiyp, taǵy da qutqarý qyzmetinen kómek suraidy. Oqýshy birneshe ret mekenjaidy anyq aityp, "aýyr jaraqat aldym" dese, qońyraýǵa jaýap bergen kezekshi senbegen.
Tek 55 minýt ótken soń jedel járdem shaqyrtypty. Endi osy jaýapsyzdyǵy úshin sýdia jarty jalǵa bas bostandyǵyn shektedi. Sondai-aq jábirlenýshi tarapqa bir million teńge kóleminde ótemaqy tóleidi. Biraq qutqarýshy taǵylǵan aiyppen kelispedi. Ol apelliatsiialyq aryz túsiremin dep otyr.
"Birjanov QR QK 371-baby, 1-bóligimen qylmystyq quqyqbuzýshylyq jasaǵany úshin kináli dep tanylyp, oǵan alty ai merzimge bas bostandyǵyn shekteý jazasy taǵaiyndalsyn. Jábirlenýshige bir million shyǵyndy ótesin", - dedi Aqtóbe №2 sotynyń sýdiasy Ahmetqali Moldaǵaliev.
