Islamabadta juma namazy kezinde meshitte jasalǵan terakt saldarynan keminde 31 adam qaza taýyp, 170-ke jýyq adam jaralandy, dep habarlaidy Dala News.
Pákistan astanasyndaǵy meshitterdiń birinde jankeshti lańkes ózin ǵimarattyń kireberisinde jaryp jibergen. Politsiia málimetinshe, kúdiktini meshitke kirer aldynda toqtatýǵa tyrysqan, sol sátte ol jarylǵysh qurylǵyny iske qosqan. Qurbandar sany artýy múmkin, jaralanǵandardyń birqatarynyń jaǵdaiy aýyr.
Sońǵy jyldary Pákistanda ekstremistik toptardyń shabýyldary jiilep, qaýipsizdik máselesi ýshyǵyp otyr.
Osy oqiǵaǵa bailanysty Qazaqstan Prezidenti Qasym-Jomart Toqaev Pákistan basshylyǵyna kóńil aitý jedelhatyn joldady. Memleket basshysy Asif Ali Zardari men Premer-ministr Shahbaz Sharif atyna joldaǵan jedelhatynda Islamabadta bolǵan terroristik aktini qatań aiyptap, qaza tapqandardyń otbasylary men zardap shekkenderge qoldaý bildirdi.
Prezident Qazaqstannyń Pákistan halqymen yntymaqta ekenin atap ótip, Pákistan astanasy Islamabadta bolǵan qaiǵyly jaǵdaiǵa bailanysty kóńil aitty.
