Almaty garnizonynyń áskeri soty qańtar oqiǵasy kezinde arheolog Erlan Jaǵyparov pen Áýez Qapsalanovtyń ólimine kináli dep tanylǵan Ulttyq ulannyń burynǵy podpolkovnigine qatysty úkim shyǵardy, dep habarlaidy Dalanews.kz.
Sot isti jabyq rejimde "Bilikti asyra paidalaný, aýyr zardaptarǵa ákelip soqtyrý" baby boiynsha (QR QK 451-baby 2-bóligi) qarady. Sottalýshy otstavkadaǵy podpolkovnik Aitjan Áýbákirov 5571 áskeri bóliminde komandirdiń tárbie, áleýmettik jáne quqyqtyq jumystar jónindegi orynbasary bolǵan.
Áskeri sot Áýbákirovti kináli dep tanyp, 7 jylǵa bas bostandyǵynan aiyrdy.
49 jastaǵy Erlan Jaǵyparov — tarihi muralardy zertteýmen ainalysqan belgili erikti, "Petroglif izdeýshiler" qoǵamynyń múshesi. Ol qańtar oqiǵasy kezinde joǵalyp ketip, birneshe kúnnen keiin máiithanadan tabyldy. Marqumnyń denesinen 10-nan astam oq izi anyqtalǵan.
"Marqumnyń týystary ony birneshe kún boiy izdedi. Áleýmettik jelilerde onyń joǵalǵany týraly habar tarady. Aqyry 12 qańtarda qaraly habar jetti: Erlan Jaǵyparovtyń denesi máiithanadan tabyldy. Onyń inisi Nurlan Jaǵyparovtyń aitýynsha, Erlandy máiithana dálizinde, qolyna kisen salynǵan, azaptaý belgileri bar kúiinde tapqan. Quqyq qorǵaý organdarynyń esebine sáikes, ol júrek tusyna tigen oqtan kóz jumǵan. Sot-meditsinalyq sarapshysy Erjan Qasymbekovtyń málimetinshe, Jaǵyparov alǵashynda tikesinen tik turǵan kúiinde jaraqat alǵan. Alaida keiinnen oǵan jerde jatqanda da oq atylǵan. Sarapshy denesinen 10 oq jaraqatyn anyqtaǵan" dep jazady Orda.kz.
Buǵan deiin Almatyda qańdy Qańtar oqiǵasy kezinde ákeleri oqqa ushyp, al analary jol apatyna túsken jetim tórt balaǵa Qazaq Stroy kompaniiasy baspana tartý etkenin jazǵan edik.
