Aqtaýdaǵy tórt qabatty galereialyq úidiń turǵyndary kóz jasyna erik berýde. Sebep – joǵarǵy qabattaǵy bir páterde adam tózgisiz jaǵdai qalyptasqan: úi iesi antisanitariia ornatyp, ondaǵan mysyq ustap, qoqysty shyǵarmai, búkil úidi ziiankesterdiń oshaǵyna ainaldyrǵan. Sonyń kesirinen kórshilerdiń páterlerin taraqan men qandala basqan, dep habarlaidy Dalanews.kz Lada.kz-ke silteme jasap.
Jergilikti turǵyndardyń aitýynsha, bul páterde alkogolge táýeldi er adam turady. Oǵan kúnde dostary jinalyp, qoqys úiip, úidi kúizeltken. Saldarynan jándikter búkil podezd ben kórshilerdiń páterlerine tarap ketken. Dezinfektorlar birneshe ret shaqyrylsa da, “mundai jaǵdaida óńdeý bos áýreshilik, sebebi edenderdi tolyq sylyp, tusqaǵazdardy alyp, jihazdy túgel joiý qajet” dep bas tartqan.
“Biz qansha ret ortaq aqsha shyǵaryp, úilerimizdi óńdetsek te, bári beker. Alǵashqy oshaǵy – sol páter tazalanbaiynsha, nátije bolmaidy. Ózdiginen ol muny jasamaityny anyq. Dezinfektsiiaǵa kelgen mamandar kórip shoshyp ketti”, – deidi turǵyndar.
Ýchaskelik politsei máseleni zerttep, múmkindikterdi qarastyryp jatqanyn aitqan. Onyń ishinde úi iesiniń týystaryn tabý, narkologiialyq mekemege jatqyzý jaiy da sóz bolǵan. Biraq munyń bári uzaq ári kúrdeli zańdyq rásimderdi qajet etedi.
Al sanitarlyq-epidemiologiialyq baqylaý mamandary «bizde ózgeniń jeke páterin májbúrli túrde óńdeýge zańdy ókilet joq» dep qol qýsyryp otyr. Qyzmetkerlerdiń aitýynsha, tek sot sheshimi nemese qaýiptilik týraly resmi qorytyndy bolǵan jaǵdaida ǵana áreket etýge múmkindik bar.
Qazir turǵyndar politsiiaǵa shaǵymdanyp, qol jinap, sotqa júginýge daiyndalýda. Olar kommýnaldyq qyzmetterdiń áreketsizdigin qujattap, foto-video dálelder jinaýda.
“Biz aqsha tólep, kúsh jumsap jatyrmyz. Biraq kórshiniń antisanitariiasy joiylmaiynsha, bári beker. Ár óńdeýden keiin qandala qaita qaptaidy”, – deidi turǵyndar.
Úi turǵyndary ortaq chat ashyp, jaǵdaidy baqylaýda ustap otyr. Keibiri qala basshylyǵy men BAQ-qa habarlasyp, máseleni jariia etýdi kózdeýde.
Olardyń basty talaby – páterdi zańdy túrde tártipke keltirýdi jedeldetý. Óitkeni bul – bir úidiń emes, júzdegen adamnyń densaýlyǵyna tikelei qaýip tóndirip otyrǵan jaǵdai.
