اقتاۋداعى ءتورت قاباتتى گالەرەيالىق ءۇيدىڭ تۇرعىندارى كوز جاسىنا ەرىك بەرۋدە. سەبەپ – جوعارعى قاباتتاعى ءبىر پاتەردە ادام توزگىسىز جاعداي قالىپتاسقان: ءۇي يەسى انتيسانيتاريا ورناتىپ، ونداعان مىسىق ۇستاپ، قوقىستى شىعارماي، بۇكىل ءۇيدى زيانكەستەردىڭ وشاعىنا اينالدىرعان. سونىڭ كەسىرىنەن كورشىلەردىڭ پاتەرلەرىن تاراقان مەن قاندالا باسقان، دەپ حابارلايدى Dalanews.kz Lada.kz-كە سىلتەمە جاساپ.
جەرگىلىكتى تۇرعىنداردىڭ ايتۋىنشا، بۇل پاتەردە الكوگولگە تاۋەلدى ەر ادام تۇرادى. وعان كۇندە دوستارى جينالىپ، قوقىس ءۇيىپ، ءۇيدى كۇيزەلتكەن. سالدارىنان جاندىكتەر بۇكىل پودەزد بەن كورشىلەردىڭ پاتەرلەرىنە تاراپ كەتكەن. دەزينفەكتورلار بىرنەشە رەت شاقىرىلسا دا، “مۇنداي جاعدايدا وڭدەۋ بوس اۋرەشىلىك، سەبەبى ەدەندەردى تولىق سىلىپ، تۇسقاعازداردى الىپ، جيھازدى تۇگەل جويۋ قاجەت” دەپ باس تارتقان.
“ءبىز قانشا رەت ورتاق اقشا شىعارىپ، ۇيلەرىمىزدى وڭدەتسەك تە، ءبارى بەكەر. العاشقى وشاعى – سول پاتەر تازالانبايىنشا، ناتيجە بولمايدى. وزدىگىنەن ول مۇنى جاسامايتىنى انىق. دەزينفەكسياعا كەلگەن ماماندار كورىپ شوشىپ كەتتى”، – دەيدى تۇرعىندار.
ۋچاسكەلىك پوليسەي ماسەلەنى زەرتتەپ، مۇمكىندىكتەردى قاراستىرىپ جاتقانىن ايتقان. ونىڭ ىشىندە ءۇي يەسىنىڭ تۋىستارىن تابۋ، ناركولوگيالىق مەكەمەگە جاتقىزۋ جايى دا ءسوز بولعان. ءبىراق مۇنىڭ ءبارى ۇزاق ءارى كۇردەلى زاڭدىق راسىمدەردى قاجەت ەتەدى.
ال سانيتارلىق-ەپيدەميولوگيالىق باقىلاۋ ماماندارى «بىزدە وزگەنىڭ جەكە پاتەرىن ءماجبۇرلى تۇردە وڭدەۋگە زاڭدى وكىلەت جوق» دەپ قول قۋسىرىپ وتىر. قىزمەتكەرلەردىڭ ايتۋىنشا، تەك سوت شەشىمى نەمەسە قاۋىپتىلىك تۋرالى رەسمي قورىتىندى بولعان جاعدايدا عانا ارەكەت ەتۋگە مۇمكىندىك بار.
ءقازىر تۇرعىندار پوليسياعا شاعىمدانىپ، قول جيناپ، سوتقا جۇگىنۋگە دايىندالۋدا. ولار كوممۋنالدىق قىزمەتتەردىڭ ارەكەتسىزدىگىن قۇجاتتاپ، فوتو-ۆيدەو دالەلدەر جيناۋدا.
“ءبىز اقشا تولەپ، كۇش جۇمساپ جاتىرمىز. ءبىراق كورشىنىڭ انتيسانيتارياسى جويىلمايىنشا، ءبارى بەكەر. ءار وڭدەۋدەن كەيىن قاندالا قايتا قاپتايدى”، – دەيدى تۇرعىندار.
ءۇي تۇرعىندارى ورتاق چات اشىپ، جاعدايدى باقىلاۋدا ۇستاپ وتىر. كەيبىرى قالا باسشىلىعى مەن باق-قا حابارلاسىپ، ماسەلەنى جاريا ەتۋدى كوزدەۋدە.
ولاردىڭ باستى تالابى – پاتەردى زاڭدى تۇردە تارتىپكە كەلتىرۋدى جەدەلدەتۋ. ويتكەنى بۇل – ءبىر ءۇيدىڭ ەمەس، جۇزدەگەن ادامنىڭ دەنساۋلىعىنا تىكەلەي ءقاۋىپ ءتوندىرىپ وتىرعان جاعداي.
