Qanattyń jeńisine ózge ult ókilderi nege birge qýanbaidy?
Qanat Islamnyń jekpe-jeginen keiin kóńilde qalǵan dyq bar edi. Elektrondy qoiyn dápterime túrtip qoiaiyn. Syrtqa shyǵarmasam, sherge ainalar.
Bardyq. Gimndi on bes myńǵa jýyq el túregep turyp tyńdadyq, qosyldyq. Boksshylardyń ádemi oiyndaryn kórdik. Tipti úidegi eki metrlik kók bairaqty da alyp bardym. Jelbiretip otyrdym. Aiqailap urandadym. "Qanat!", "Qazaqstan!", "Árýaq!", "Ur!", "Qulat!" deýmen tamaǵym da qarlyqty.
Jeti jekpe-jektiń sońynan rýhtanyp shyqtyq. Nege rýhtandym? Ainalamda tek qazaqtar boldy. Bári qazaqsha sóilep júrdi. Qazaqy ázil-qaljyńdar boldy aramyzda. Ringte qazaqtyń jigitteri atoilap, qazaq kommentatorlar qazaqsha sairap jatty. Qazaqtar maǵan rýh berdi.
Úige kele jatqanda ǵana basqa diaspora adamdary men etnostardy kórdim. Olar "Almaty - Arenanyń" ishinde nege bolmady?
Al qazaqtar Gena dese, maqtanady. Vasilii Jirovqa da shapan japqan. Olga Shishiginany tórge shyǵaryp, Parlamentke otyrǵyzyp qoidy. Otgontsetsegti de erkeletip, tizemizge otyrǵyzdyq. Endeshe olar nege bizben birge shattanbaidy?
Nege qazaqtyń bireýi qylmys jasasa orystildi saittar shýlaidy? Basqa etnostan bolsa úndemei qoia salady?
Jaýabym bar. Olar qazaqty túsiný úshin qazaq tilin bilýi tiis. Bilmeidi. Bilmegen soń bizdi túsinbeidi. Túsinbegen soń bizben birge qýanyp, muńaia almaidy. Al biz orys tilin túsinemiz, sóileimiz, jazamyz, iaǵni olarǵa janymyz ashyp, ózimizge jaqyn tartamyz.
Qazaqstannyń qazirgi tatýlyǵy men birligi assambleiada emes, qazaqtyń keńpeiildigi men darhandyǵynda. Adamgershiliginde, dástúrinde.
Búkil Qazaqstan bir kisidei qýanýy ári birge qaiǵyrýy úshin bir tilde bolmaq kerek.
