Qajylyq maýsymyna bailanysty Saýd Arabiiasy Mekke qalasyna kirýge birqatar shekteý engizdi, dep habarlaidy Dala News.
Mekke óńirindegi Syrtqy ister ministrliginiń filialynyń málimetinshe, bul sharalar qajylardyń qaýipsizdigin qamtamasyz etý jáne dini rásimderdi tártippen ótkizý úshin qabyldanǵan.
Jańa talaptarǵa sáikes, 2026 jylǵy 18 sáýir men 31 mamyr aralyǵynda «Nusuk» platformasy arqyly ýmra jasaýǵa ruqsat berý ýaqytsha toqtatylady.
Sonymen qatar 18 sáýirden bastap Mekke qalasyna kirý jáne onda bolý barlyq vizalar úshin shekteledi. Erekshelik tek arnaiy qajylyq vizasy bar azamattarǵa ǵana qatysty.
Bilik ókilderi bul talaptardy buzý Saýd Arabiiasy zańnamasyna sáikes jaýapkershilikke ákeletinin eskertti.
Quzyrly organdar barlyq azamattardy, sonyń ishinde sheteldikterdi de, belgilengen tártipti qatań saqtaýǵa shaqyrdy.
