Sheshenstan astanasy Groznyida úshinshi márte respýblika basshysy bolyp sailanǵan Ramzan Qadyrovty inaýgýratsiialaý saltanaty ótti. Qadyrovtyń qyzmetke kirisý keshi saiasatkerdiń 40 jasqa tolýy men Qala kúnine sáikes kelip tur.
"Jaratqan Allanyń qalaýymen, men úshinshi márte Sheshenstan Respýblikasy halqynyń bolashaǵy men taǵdyry úshin úlken jaýapkershilik arqalap otyrmyn. Jaratqan Allanyń qoldaýymen bar kúshimdi, bilimim men tájiribemdi halqyma qyzmet etýge, eldiń gúldenýine jáne ádildiktiń ornaýyna arnaimyn", - dep ant qabyldady Qadyrov.
Ol dál osy kúni ákesi Ahmat qajy Qadyrov 13 jyl buryn 5 qazanda Sheshenstan prezidenti bolyp sailanǵanyn esine túsirip, kózine jas aldy. Qadyrov antty sheshen ulttyq kiimimen qabyldady. Ol antty sheshen jáne orys tilderinde oqydy.
Saltanatty kesh Sheshenstan memlekettik filarmoniiasynyń zalynda respýblika parlamentiniń otyrysy kezinde ótkizildi. 18 qyrkúiektegi sailaýda Qadyrov, "Edina Rossiia" partiiasynyń úmitkeri, 97,94 paiyz daýys jinady. Sheshenstanda sailaýshylardyń 94,8 paiyzy daýys berýge qatysty dep habarlandy.
Qadyrovty synaýshylar jáne Sheshenstandaǵy adam quqyǵyn qorǵaýshylar respýblika basshysyn adam quqyǵyn óreskel buzǵany, atap aitqanda adamdardy urlap áketip, azaptap, kisi óltirgeni úshin aiyptap otyr.
