Qadir túni – musylmandar úshin eń qasıetti ári saýapqa toly túnderdiń biri. Bul túnde Alla Taǵalanyń erekshe meıirimi tógilip, qulshylyq etken adamnyń kúnálary keshiriledi. Sondyqtan bul múmkindikti jiberip almaý úshin qandaı amaldar jasaý qajet ekenin bilgen jón.
Qadir túniniń mańyzy
Qasıetti Quranda Qadir túni týraly arnaıy súre bar. Onda bul túnniń myń aıdan da qaıyrly ekeni aıtylady:
“Qadir túni myń aıdan da artyq. Ol túni perishteler jáne Jábireıil (ǵ.s.) Rabbylarynyń ruqsaty boıynsha barlyq is úshin túsedi. Ol tań atqanǵa deıin beıbitshilik túni” (Qadir súresi, 3-5 aıattar).
Demek, bul túni jasaǵan qulshylyq, duǵa, ıgi amaldar 83 jyldyq saýapqa teńesedi.
Qadir túninde qandaı amaldar jasaý kerek?
Namaz oqý
Bul túni kóp namaz oqyp, Jaratýshyǵa jaqyndaýdyń mańyzy zor. Taraýıh, táhajjúd namazyn oqýǵa bolady. Eger múmkindigińiz bolmasa, eń az degende 2 rákát nápil namaz oqyńyz.
Quran oqý jáne tyńdaý
Quran – Qadir túninde túsken eń uly kitap. Sondyqtan bul túni Quran oqyp, onyń maǵynasyn túsinýge tyrysyńyz. Eger ózińiz oqı almasańyz, aýdıojazbasyn tyńdańyz nemese tápsirin oqyńyz.
Duǵa jasaý
Paıǵambarymyz (s.ǵ.s.) Qadir túninde myna duǵany kóp oqýǵa keńes bergen:
"Allahýmmá ınnáká afýýn, týhıbbýl afýa fa’fý annı."
("Ýa, Alla, Sen – asa keshirimdisiń, keshirýdi jaqsy kóresiń, meni keshire gór").
Sondaı-aq ózińiz, ata-anańyz, jaqyndaryńyz ben kúlli musylmandar úshin ıgi duǵa jasańyz.
Táýbe etý jáne keshirim suraý
Bul túni shyn júrekten táýbe etip, jasaǵan kúnálaryńyz úshin keshirim surańyz. “Astaǵfırýllah” dep 100 ret aıtý da – saýapty is.
Sadaqa berý jáne qaıyrymdylyq jasaý
Qoldan kelgenshe sadaqa berińiz. Qaıyrymdylyq – kúnálardyń keshirilýine sebepshi. Eger múmkindik bolmasa, jyly sóz aıtyp, jaqsy amal isteý de sadaqa sanalady.
Allany zikir etý
“Sýbhanallah”, “Álhamdýlıllah”, “Allahý ákbar”, “Lá ıláha ıllalah” degen zikirlerdi jıi aıtý – saýapqa kenelýdiń bir joly.
Týǵan-týyspen jaqsy qarym-qatynas ornatý
Qadir túni renjisken adamdarmen tatýlasý, týystardyń jaǵdaıyn suraý – óte mańyzdy. Óıtkeni Alla Taǵala týystyq baılanysty úzgen adamǵa meıirimin tókpeıdi.
Ǵıbadatpen tańdy atyrý
Bul túni uıqydan bas tartyp, barynsha qulshylyq etýge tyrysyńyz. Eger tańǵa deıin otyrý qıyn bolsa, eń bolmaǵanda túnniń sońǵy úshinshi bóliginde ǵıbadat jasańyz.
Qadir túni – kúnálar keshirilip, saýap eselenetin erekshe múmkindik. Bul túndi barynsha qulshylyqpen ótkizip, Allanyń razylyǵyna umtylaıyq!
