Nurlan Orazalindi aiamai synaǵandar da az bolmady. Tipti barsha jurt rýhani jańǵyryp jatqanda, jazýshylar odaǵy nege jańǵyrmai qaldy degen de suraqtar qoiyldy, dep habarlaidy 31 arna.
Tańǵy onnan bastap jazýshylar odaǵyna jinalǵan qalamgerlerdiń qarasy kóp. Ádebietshiler aldynda besinshi quryltaidyń ótetin kúnin belgilep, odaq jumysyna baǵa berý maqsaty turdy. Al jiyndy bastaǵan Nurlan Orazalin birden aldaǵy quryltaida óziniń sailaýǵa túspeitinin málimdedi.
“Túspeimin degen sózdi men taǵy da qaitalap aitqym keledi. Úitkeni maǵan jetip jatqan áńgimede Nurlan taǵy da aldap-suldap, erteń ýaqytty sozyp, myna báigege aiaq asty ózi túsip ketip osy besinshi ret myna bilikti qolyna alyp alǵysy keledi degen sózdi aitatyn kórinedi. Ondai bolýy múmkin emes, Qabeke”, – deidi jazýshylar odaǵynyń tóraǵasy Nurlan Orazalin.
Qabeke dep, odaq tóraǵasynyń Qabdesh Jumadilovke qaratyp aitýy da beker emes. Osyǵan deiin Orazalinge orynyńda otyryp aldyń dep shúilikken de dál osy halyq jazýshysy edi. Dese de Jumadilov bul joly da qarap qalmady.
“Ómiri keshpeitin nárse Nurlannyń betinde qalady ol. Alash degen atty aiaqqa basyp, 42 adamǵa bir kúnde úlestirý degen ne boldy sonshama? Ne jetpedi? Alash syilyǵyn 2 adam 3 adam alatyn buryn uzasa”, – deidi Qazaqstannyń halyq jazýshysy Qabdesh Jumadilov.
Odaq tóraǵasynyń jumysyna oń baǵa bergender de az bolǵan joq. Ádebietshiler qalamaqy máselesiniń bir jolǵa qoiylýy men odaq ǵimaraty tistegenniń aýzynda, ustaǵannyń qolynda ketpeýin Orazalinniń eńbegi dep biledi. Sondai-aq qalamgerler odaqtyń assambleia men dúniejúzilik qazaqtar qaýymdastyǵy sekildi memleket tarapynan qarjylandyrylyp, ideologiiany júrgizetin biregei uiymǵa ainalatyn ýaqyty jetti degen pikirlerin de ortaǵa saldy.
“Baiaǵyda Kolbindi osy jerge shaqyryp alyp turyp Juban Moldaǵaliev, Safýan Sháimerdenov sóilegen kezdegi aibar qandai edi, jazýshylar odaǵynyń? Kókke jeter edi. Al odan keiin Muhtar Shahanov erjúrektik jasap, anoý búkilodaqtyq sezde sóilegeni ol da Qazaqstan jazýshylar odaǵynyń aibary”, – deidi aqyn Temirhan Medetbek.
80 jyldan astam tahihy bar, 800 den asa aqyn-jazýshysy bar odaqtaǵylar 5 saǵat boiy bes jyldaǵy qordalanǵan máselelerdi ortaǵa saldy. Osylaisha olar aldaǵy 12-i naýryz kúni odaqtyń jańa tóraǵasyn sailap, jańasha baǵdarlama qurmaq.
