نۇرلان ورازاليندٸ اياماي سىناعاندار دا از بولمادى. تٸپتٸ بارشا جۇرت رۋحاني جاڭعىرىپ جاتقاندا, جازۋشىلار وداعى نەگە جاڭعىرماي قالدى دەگەن دە سۇراقتار قويىلدى, دەپ حابارلايدى 31 ارنا.
تاڭعى وننان باستاپ جازۋشىلار وداعىنا جينالعان قالامگەرلەردٸڭ قاراسى كٶپ. ەدەبيەتشٸلەر الدىندا بەسٸنشٸ قۇرىلتايدىڭ ٶتەتٸن كٷنٸن بەلگٸلەپ, وداق جۇمىسىنا باعا بەرۋ ماقساتى تۇردى. ال جيىندى باستاعان نۇرلان ورازالين بٸردەن الداعى قۇرىلتايدا ٶزٸنٸڭ سايلاۋعا تٷسپەيتٸنٸن مەلٸمدەدٸ.
“تٷسپەيمٸن دەگەن سٶزدٸ مەن تاعى دا قايتالاپ ايتقىم كەلەدٸ. ٷيتكەنٸ ماعان جەتٸپ جاتقان ەڭگٸمەدە نۇرلان تاعى دا الداپ-سۇلداپ, ەرتەڭ ۋاقىتتى سوزىپ, مىنا بەيگەگە اياق استى ٶزٸ تٷسٸپ كەتٸپ وسى بەسٸنشٸ رەت مىنا بيلٸكتٸ قولىنا الىپ العىسى كەلەدٸ دەگەن سٶزدٸ ايتاتىن كٶرٸنەدٸ. ونداي بولۋى مٷمكٸن ەمەس, قابەكە”, – دەيدٸ جازۋشىلار وداعىنىڭ تٶراعاسى نۇرلان ورازالين.
قابەكە دەپ, وداق تٶراعاسىنىڭ قابدەش جۇمادٸلوۆكە قاراتىپ ايتۋى دا بەكەر ەمەس. وسىعان دەيٸن ورازالينگە ورىنىڭدا وتىرىپ الدىڭ دەپ شٷيلٸككەن دە دەل وسى حالىق جازۋشىسى ەدٸ. دەسە دە جۇمادٸلوۆ بۇل جولى دا قاراپ قالمادى.
“ٶمٸرٸ كەشپەيتٸن نەرسە نۇرلاننىڭ بەتٸندە قالادى ول. الاش دەگەن اتتى اياققا باسىپ, 42 ادامعا بٸر كٷندە ٷلەستٸرۋ دەگەن نە بولدى سونشاما? نە جەتپەدٸ? الاش سىيلىعىن 2 ادام 3 ادام الاتىن بۇرىن ۇزاسا”, – دەيدٸ قازاقستاننىڭ حالىق جازۋشىسى قابدەش جۇمادٸلوۆ.
وداق تٶراعاسىنىڭ جۇمىسىنا وڭ باعا بەرگەندەر دە از بولعان جوق. ەدەبيەتشٸلەر قالاماقى مەسەلەسٸنٸڭ بٸر جولعا قويىلۋى مەن وداق عيماراتى تٸستەگەننٸڭ اۋزىندا, ۇستاعاننىڭ قولىندا كەتپەۋٸن ورازاليننٸڭ ەڭبەگٸ دەپ بٸلەدٸ. سونداي-اق قالامگەرلەر وداقتىڭ اسسامبلەيا مەن دٷنيەجٷزٸلٸك قازاقتار قاۋىمداستىعى سەكٸلدٸ مەملەكەت تاراپىنان قارجىلاندىرىلىپ, يدەولوگييانى جٷرگٸزەتٸن بٸرەگەي ۇيىمعا اينالاتىن ۋاقىتى جەتتٸ دەگەن پٸكٸرلەرٸن دە ورتاعا سالدى.
“باياعىدا كولبيندٸ وسى جەرگە شاقىرىپ الىپ تۇرىپ جۇبان مولداعاليەۆ, سافۋان شەيمەردەنوۆ سٶيلەگەن كەزدەگٸ ايبار قانداي ەدٸ, جازۋشىلار وداعىنىڭ? كٶككە جەتەر ەدٸ. ال ودان كەيٸن مۇحتار شاحانوۆ ەرجٷرەكتٸك جاساپ, انوۋ بٷكٸلوداقتىق سەزدە سٶيلەگەنٸ ول دا قازاقستان جازۋشىلار وداعىنىڭ ايبارى”, – دەيدٸ اقىن تەمٸرحان مەدەتبەك.
80 جىلدان استام تاحيحى بار, 800 دەن اسا اقىن-جازۋشىسى بار وداقتاعىلار 5 ساعات بويى بەس جىلداعى قوردالانعان مەسەلەلەردٸ ورتاعا سالدى. وسىلايشا ولار الداعى 12-ٸ ناۋرىز كٷنٸ وداقتىڭ جاڭا تٶراعاسىن سايلاپ, جاڭاشا باعدارلاما قۇرماق.
