Resei prezidenti Pýtinniń baspasóz hatshysy Peskovtyń qyzy Qazaqstanda resmi tirkeldi degen aqparat paida boldy. Al bul degenimiz - Reseige salynǵan sanktsiialar men shekteýlerden qashýdyń joly. Sonymen qatar, bul Peskovaǵa jergilikti bankte shot ashýǵa múmkindik beredi, - dep habarlaidy Dalanews.kz "Nastoiashee vremia" basylymyna siltep.
BAQ málimetinshe, Peskovtyń qyzymen attas Elizaveta Peskova Qazaqstanda jeke sáikestendirý nómirin (JSN) alǵan. Basylym tipti onyń týǵan kúni Peskovtyń qyzynyń týǵan kúnimen birdei ekenin jazdy. Bul málimetter Qazaqstannyń Ulttyq kýálandyrýshy ortalyǵynyń onlain-tiziliminen jáne basqa da derekqorlardan anyqtalǵan.
"Peskova JSN-di 2022 jylǵy qyrkúiekke deiin alǵan bolýy kerek, óitkeni Nur-Sultan (col kezdegi ataý boiynsha - esk.) qalasy boiynsha Memlekettik kirister basqarmasyna tirkelgen. Astana 2019 jylǵy naýryzdan 2022 jylǵy qyrkúiekke deiin Nur-Sultan atalǵany belgili, keiin qaita Astana dep ataldy", - dep jazylǵan basylym málimetinde.
Elimizdegi JSN - reseilik JSN-niń analogy, salyq tóleýshiniń jeke nómiri. Bul memlekettik jáne bank qyzmetterin alý úshin qajet. BAQ reseilikter Ýkrainamen aradaǵy jaǵdai bastalǵannan beri jergilikti bankterde shot ashý, Visa men Mastercard shekteýlerinen "qashý" úshin jappai JSN rásimdei bastaǵanyna nazar aýdarǵan.
"Peskova bul múmkindikti qanshalyq paidalanyp úlgergeni belgisiz. Bankter ádette sanktsiiaǵa ushyraǵandarǵa qyzmet kórsetýge oń qabaq tanytpaidy, onyń ústine Pýtinniń baspasóz hatshysynyń qyzy 2022 jylǵy naýryzda AQSh-tyń jáne taǵy birneshe aidan keiin Eýropa Odaǵynyń sanktsiiasyna ushyrady. Batys elderi Peskovany ákesiniń tanystary arqyly "baqýatty ómir saltyn" ustanady dep aiyptady, al onyń ákesi soǵystyń alǵashqy kúnderinde-aq sanktsiia tizimine engen. Peskova ózine qarsy shekteýdi "ádiletsiz ári negizsiz" dep, sondai-aq, "bul jaǵdaiǵa eshqandai qatysy joǵyn" alǵa tartty", - dep jazylǵan málimette.
Basylym málimetinshe, Peskova 26 jasta. Onyń negizgi aktivi - Máskeýdegi "Tsentrým" jarnama agenttigindegi 30 paiyz aktsiia.
Redaktsiia Peskovaǵa, sondai-aq, onyń PR direktoryna osy máselege bailanysty saýaldar joldaǵan.
