Reseı prezıdenti Vladımır Pýtın Reseı armıasynyń sanyn 180 myń adamǵa kóbeıtý týraly jarlyqqa qol qoıdy. Qujat 2024 jyldyń 1 jeltoqsanynan bastap kúshine enedi, - dep habarlaıdy Dalanews.kz reseılik BAQ-qa siltep.
Jarlyqqa sáıkes Reseı armıasynyń shtat sany 2 mıllıon 389 myń adamǵa deıin artady, onyń ishinde 1 mıllıon 500 myń áskerı qyzmetshi bar.
Sońǵy ret mundaı sheshim 2023 jyldyń jeltoqsanynda qabyldandy, ol kezde shtat sany 2 mln 209 myńnan asa adam, onyń ishinde 1 mln 320 myń áskerı qyzmetshi dep bekitildi. Al munyń aldynda Reseı áskeri sany 2022 jylǵy tamyzda 140 myń adamǵa kóbeıdi.
Global FirePower portalynyń málimetteri boıynsha qazirgi ýaqytta Reseı armıasy áskerı qyzmetkerler sany boıynsha álemde besinshi orynda - 1 320 000 adam. Pýtınniń jarlyǵy kúshine engennen keıin ol Úndistan men AQSH áskerı kúshterin basyp ozyp, ekinshi orynǵa turaqtaıdy. Birinshi qatarda 2 035 000 sarbazy bar áskermen Qytaı tur.
Reıtıńtiń alǵashqy ondyǵynda Soltústik Koreıa, Ýkraına, Pákistan, Iran, Ońtústik Koreıa jáne Vetnam bar.
Aıta keteıik, keshe Germanıa kanslerimen kezdesýde Olaf Sholstiń ótinishimen Qasym-Jomart Toqaev Ýkraına tóńiregindegi jaǵdaıdy retteýge baılanysty pikirin jetkizgen edi.
"Áskerı turǵyda Reseıdiń jeńilmeıtini anyq. Soǵys budan ári órshı berse, barsha adamzatqa, eń aldymen, Reseı-Ýkraına qaqtyǵysyna tikeleı qatysy bar memleketterge saldary óte aýyr tıedi", - dedi Memleket basshysy.
