رەسەي پرەزيدەنتى ۆلاديمير پۋتين رەسەي ارمياسىنىڭ سانىن 180 مىڭ ادامعا كوبەيتۋ تۋرالى جارلىققا قول قويدى. قۇجات 2024 جىلدىڭ 1 جەلتوقسانىنان باستاپ كۇشىنە ەنەدى، - دەپ حابارلايدى Dalanews.kz رەسەيلىك باق-قا سىلتەپ.
جارلىققا سايكەس رەسەي ارمياسىنىڭ شتات سانى 2 ميلليون 389 مىڭ ادامعا دەيىن ارتادى، ونىڭ ىشىندە 1 ميلليون 500 مىڭ اسكەري قىزمەتشى بار.
سوڭعى رەت مۇنداي شەشىم 2023 جىلدىڭ جەلتوقسانىندا قابىلداندى، ول كەزدە شتات سانى 2 ملن 209 مىڭنان اسا ادام، ونىڭ ىشىندە 1 ملن 320 مىڭ اسكەري قىزمەتشى دەپ بەكىتىلدى. ال مۇنىڭ الدىندا رەسەي اسكەرى سانى 2022 جىلعى تامىزدا 140 مىڭ ادامعا كوبەيدى.
Global FirePower پورتالىنىڭ مالىمەتتەرى بويىنشا قازىرگى ۋاقىتتا رەسەي ارمياسى اسكەري قىزمەتكەرلەر سانى بويىنشا الەمدە بەسىنشى ورىندا - 1 320 000 ادام. ءپۋتيننىڭ جارلىعى كۇشىنە ەنگەننەن كەيىن ول ءۇندىستان مەن اقش اسكەري كۇشتەرىن باسىپ وزىپ، ەكىنشى ورىنعا تۇراقتايدى. ءبىرىنشى قاتاردا 2 035 000 ساربازى بار اسكەرمەن جۇڭگو تۇر.
رەيتينگتىڭ العاشقى وندىعىندا سولتۇستىك كورەيا، ۋكراينا، پاكىستان، يران، وڭتۇستىك كورەيا جانە ۆەتنام بار.
ايتا كەتەيىك، كەشە گەرمانيا كانسلەرىمەن كەزدەسۋدە ولاف ءشولستىڭ وتىنىشىمەن قاسىم-جومارت توقايەۆ ۋكراينا توڭىرەگىندەگى جاعدايدى رەتتەۋگە بايلانىستى پىكىرىن جەتكىزگەن ەدى.
"اسكەري تۇرعىدا رەسەيدىڭ جەڭىلمەيتىنى انىق. سوعىس بۇدان ءارى ءورشي بەرسە، بارشا ادامزاتقا، ەڭ الدىمەن، رەسەي-ۋكراينا قاقتىعىسىنا تىكەلەي قاتىسى بار مەملەكەتتەرگە سالدارى وتە اۋىر تيەدى"، - دەدى مەملەكەت باسشىسى.
