Resei prezidenti Vladimir Pýtin Reseidiń dopingke qarsy júiesiniń sátsizdikke ushyraǵanyn moiyndady.
Krasnoiarskide 2019 jyly ótetin Ýniversiadaǵa daiyndyqqa arnalǵan jiynda sóilegen Pýtin Dúniejúzilik dopingke qarsy agenttiktiń (WADA) málimdemesi men kanadalyq professor Richard Maklarenniń táýelsiz komissiiasynyń esebine olardyń "jumystarynda jańsaqtyq jibergenine" qaramastan qulaq asýǵa shaqyrdy.
"Bul - bizdiń kinámiz" degen Pýtin Resei sportynda "doping qoldanýdyń aiqyn rastalǵan oqiǵalary" baryn aityp, olardy moiyndaýǵa jáne kinálilerdi anyqtap, tekserý júrgizýge shaqyrdy.
Maklaren esebiniń ekinshi bólimi 2016 jyly 9 jeltoqsanda jariialanǵan. Onda 2014 jyly Sochide ótken qysqy Olimpiadada myńǵa tarta reseilik sportshynyń dopig synaǵynda qiturqylyq jasaǵany aitylady. Esepte budan ózge, Máskeýdiń dopingke qarsy zerthanasynyń qyzmetkerleri doping bary anyqtalǵan synamalardy jasyrdy dep aiyptalǵan.
Budan soń Resei 2017 jyly bobslei men skeletonnan álem birinshiligin ótkizý quqyǵynan aiyryldy. Al Resei biatlonshylar odaǵy osy maýsymda Túmende álem kýbogynyń kezeńin ótkizbeýge sheshim qabyldady. Keiin WADA baiandamadaǵy aiǵaqtyń jetkiliksiz bolǵanyn moiyndaǵan.
Maklaren baiandamasynyń alǵashqy bólimi shyqqan soń Halyqaralyq olimpiada komiteti reseilik 100 shaqty sportshyny Rio-de-Janeiro Olimpiadasynan shettetken. Resei quramasy sonymen birge Paralimpiada oiyndaryna da qatystyrylǵan joq.
Derekkóz: Azattyq
