رەسەي پرەزيدەنتى ۆلاديمير پۋتين رەسەيدىڭ دوپينگكە قارسى جۇيەسىنىڭ ساتسىزدىككە ۇشىراعانىن مويىندادى.
كراسنويارسكىدە 2019 جىلى وتەتىن ۋنيۆەرسياداعا دايىندىققا ارنالعان جيىندا سويلەگەن پۋتين دۇنيەجۇزىلىك دوپينگكە قارسى اگەنتتىكتىڭ (WADA) مالىمدەمەسى مەن كانادالىق پروفەسسور ريچارد ماكلارەننىڭ تاۋەلسىز كوميسسياسىنىڭ ەسەبىنە ولاردىڭ "جۇمىستارىندا جاڭساقتىق جىبەرگەنىنە" قاراماستان قۇلاق اسۋعا شاقىردى.
"بۇل - ءبىزدىڭ كىنامىز" دەگەن پۋتين رەسەي سپورتىندا "دوپينگ قولدانۋدىڭ ايقىن راستالعان وقيعالارى" بارىن ايتىپ، ولاردى مويىنداۋعا جانە كىنالىلەردى انىقتاپ، تەكسەرۋ جۇرگىزۋگە شاقىردى.
ماكلارەن ەسەبىنىڭ ەكىنشى ءبولىمى 2016 جىلى 9 جەلتوقساندا جاريالانعان. وندا 2014 جىلى سوچيدە وتكەن قىسقى وليمپيادادا مىڭعا تارتا رەسەيلىك سپورتشىنىڭ دوپيگ سىناعىندا قيتۇرقىلىق جاساعانى ايتىلادى. ەسەپتە بۇدان وزگە، ماسكەۋدىڭ دوپينگكە قارسى زەرتحاناسىنىڭ قىزمەتكەرلەرى دوپينگ بارى انىقتالعان سىنامالاردى جاسىردى دەپ ايىپتالعان.
بۇدان سوڭ رەسەي 2017 جىلى بوبسلەي مەن سكەلەتوننان الەم بىرىنشىلىگىن وتكىزۋ قۇقىعىنان ايىرىلدى. ال رەسەي بياتلونشىلار وداعى وسى ماۋسىمدا تۇمەندە الەم كۋبوگىنىڭ كەزەڭىن وتكىزبەۋگە شەشىم قابىلدادى. كەيىن WADA بايانداماداعى ايعاقتىڭ جەتكىلىكسىز بولعانىن مويىنداعان.
ماكلارەن بايانداماسىنىڭ العاشقى ءبولىمى شىققان سوڭ حالىقارالىق وليمپيادا كوميتەتى رەسەيلىك 100 شاقتى سپورتشىنى ريو-دە-جانەيرو وليمپياداسىنان شەتتەتكەن. رەسەي قۇراماسى سونىمەن بىرگە پاراليمپيادا ويىندارىنا دا قاتىستىرىلعان جوق.
دەرەككوز: ازاتتىق
