Bul týraly Dalanews.kz habarlaidy.
Sarapshynyń pikirinshe soǵystyń ótinde júrgenderdiń arasynda Máskeýdiń turǵyndaryn saýsaqpen sanap alasyz. Esesine, buratana ulttardyń ókilderi Pýtin úshin janyn berýge ázir.
Kreml kósemi iri qalalardyń turǵyndaryn ásker qataryna shaqyrýdan seskenedi, munyń sońy ereýilge ulasady dep qaýiptenedi.
"Ýkrain jerinde qaza tapqan basqynshylardyń kópshiligi Reseidiń shalǵai óńirinen shaqyrtylǵan azamattar. Bulardyń basym kópshiligi bolashaǵy buldyr, it bailasa turmaityn, depressivti eldi-mekender. Máskeý sekildi megapolisterdiń turǵyndary qolyn qanǵa malǵandy qalamaidy. Pýtinniń qanquily josparyn júzege asyrý Býriatiia men Daǵystannyń turǵyndaryna júktelgen syndy. Reseidiń yńyrshaǵy shyqqan kedei óńirler Pýtindi pir tutady..." – deidi Oreshkin.
Onyń atap ótkenindei Resei turǵyndary Pýtin shapqynshylyǵyn basybútin qoldamaidy. Buǵan jan-tánimen qarsy, propagandanyń ýaǵyzyna aldanbaityn, Kremldiń saiasatyna tisin qairap júrgen aýditoriianyń qarasy ulǵaiyp keledi.
Máskeý tárizdi iri qalalarda Resei agressiiasyn turǵyndardyń ári ketkende 15 paiyzy ǵana qoldaidy. Ózgeleri ishten tynyp júr.
"Pýtin iri qalalardan sarbaz shaqyrtar bolsa, munyń sońy aiǵai-shýǵa, dúrbeleńge ulasady. Órkenietti ómirdiń dámin tatyp, Batystyń qundylyqtaryn qabyldaǵan kózi ashyq reseilikter qolyna qarý alyp, bógde eldiń tynyshtyǵyn buzýǵa qarsy. Osy sebepti de Ýkrain jerinde Kremldiń dotatsiiasynda otyrǵan – sheshender, daǵystandar, býriattar soǵysyp júr", – deidi Oreshkin.
Sarapshynyń pikirinshe, bul qubylysty aityp túsindirý múmkin emes. Ádette, joqshylyqtan, tapshylyqtan júikesi juqarǵan óńirler patshanyń basqynshy saiasatyna qarsy shyǵyp, soǵysqa jumsalǵan ailapat aqshany, halyqqa qaitarýdy talap etýi kerek edi.
Reseidiń jaǵdaiynda Kreml kósemi óz paiymy joq, propagandanyń degenine kúmánsiz senetin, Pýtindi qudai sanaityn kedei-kepshikke arqa súiep otyr. Ýkrain jerinde oqqa ushyp, súiegi kómýsiz qalyp jatqan dál osy aýditoriia.
