Japoniia úkimeti Resei prezidenti Vladimir Pýtinniń Itýrýp aralyna barǵanynan keiin Máskeýge qarsy sanktsiialardy kúsheitý múmkindigin qarastyryp jatyr. Bul týraly NHK telearnasy habarlady, dep habarlaidy dalanews.kz.
Pýtin buǵan deiin Sahalin oblysyna jumys saparymen baryp, óńir gýbernatory Valerii Limarenkomen kezdesken. Keiin ol Itýrýp aralyna baryp, áleýmettik nysandardyń jumysymen tanysty.
NHK málimetinshe, Tokio Resei prezidentiniń bul saparyna jaýap retinde qandai shara qabyldaý qajettigin talqylaýda. Sonyń ishinde Japoniia halyqaralyq seriktesterimen birge engizip otyrǵan sanktsiialyq shekteýlerdi qatańdatý máselesin qarastyryp jatyr.
Japoniianyń Syrtqy ister ministrligi Reseige resmi narazylyq bildirdi. Vedomstvo basshysy Tosimitsý Motegi Ońtústik Kýril araldaryn Japoniianyń «ajyramas aýmaǵy» dep atap, Pýtinniń saparyn qabyldaýǵa bolmaityn áreket retinde baǵalady. Sondai-aq Reseidiń Japoniiadaǵy elshisi Nikolai Nozdrev japon SIM-ine shaqyryldy.
Óz kezeginde reseilik diplomat Kýril araldary Resei Federatsiiasynyń ajyramas bóligi ekenin málimdedi. Onyń aitýynsha, Resei prezidentiniń el aýmaǵyndaǵy kez kelgen óńirge, sonyń ishinde Kýril araldaryna jasaǵan sapary shet memlekettermen talqylanatyn másele emes.
Japoniia premer-ministri Sanae Takaiti de Pýtinniń Itýrýpqa barýy Tokionyń ustanymyna qaishy keletinin aitty. Onyń pikirinshe, bul qadam eki el arasyndaǵy qarym-qatynasty qalpyna keltirý múmkindigin odan ári qiyndatady.
Al Resei Qaýipsizdik keńesi tóraǵasynyń orynbasary Dmitrii Medvedev Kýril araldarynyń Reseige tiesili ekenin moiyndamaityndarǵa «aýyr saldar» bolýy múmkin ekenin eskertti.
Resei Syrtqy ister ministrliginiń resmi ókili Mariia Zaharova bolsa, japon biliginiń reaktsiiasyn «revizionistik kózqarastyń kórinisi» dep baǵalady. Onyń sózinshe, Tokionyń Reseige qatysty qazirgi saiasaty japon halqynyń múddesine sai kelmeidi.
Aita keteiik, Kýril araldaryna qatysty aýmaqtyq daý Ekinshi dúniejúzilik soǵystan beri Resei men Japoniia arasyndaǵy negizgi kelispeýshilikterdiń biri bolyp keledi. Osy máseleniń sheshilmeýi eki eldiń tolyqqandy beibit kelisim jasaýyna da kedergi keltirip otyr.
