Qazaqstanda psihologiialyq qyzmet kórsetý salasyn júieleýge baǵyttalǵan jańa zań jobasy ázirlenip jatyr. Bul týraly depýtat Ashat Aimaǵambetov málimdedi, dep habarlaidy Dalanews.kz.
Onyń aitýynsha, qazirgi tańda bul salada naqty talaptar men baqylaý tetikteriniń bolmaýy azamattardyń psihikalyq saýlyǵyna qaýip tóndirip otyr.
"Kóshede samsa satý úshin sanitarlyq kitapsha kerek, al adam janymen jumys isteý úshin eshteńe qajet emes pe?
Kúizeliske túsken jan Instagramnan ádemi paraqshasy men kúmándi sertifikaty bar "psihologty" tabady. Sońǵy aqshasyn berip, ailap barady, biraq jaǵdaiy nasharlai túsedi. Al shaǵymdanaiyn dese - bul sala múldem rettelmegen.
Eger aspaz halyqty ýlasa - jaýapqa tartylady. Al eger jalǵan psiholog adamnyń taǵdyryn qurtsa she? Osy ýaqytqa deiin bul úshin eshkim jaýap bermeitin", – dedi ol.
Aimaǵambetovtiń aitýynsha, jańa zań jobasy aiasynda birqatar mańyzdy ózgerister engiziledi. Atap aitqanda, psihologtardyń biryńǵai reestri jasalyp, qyzmet kórsetý úshin arnaiy diplom talap etiledi. Sonymen qatar mamandardyń jaýapkershiligi zańmen bekitilip, kásibi qupiiany saqtaý mindeti engizilmek.
Budan bólek, psiholog pen psihiatrdyń qyzmeti naqty ajyratylyp, árqaisynyń kásibi shekarasy aiqyndalady.
Depýtat psihikalyq densaýlyq máselesi turmystyq qyzmet deńgeiinde qaralmaýy tiis ekenin atap ótti. Onyń sózinshe, bul – joǵary jaýapkershilikti talap etetin sala jáne memleket tarapynan qatań rettelýi qajet.
