Búgin RF Bas prokýratasynyń májilisine qatysqan Vladımır Pýtın reseılik tanymal telejýrnalıstiń kózin joımaq bolǵandardy Federaldi qaýipsizdik qyzmetiniń jasaǵy ustaǵanyn málimdedi. Májiliste Pýtın qaı jýrnalıske qastandyq jasalmaq bolǵanyn ashyp aıtpaǵan. Biraq artynsha qaýipsizdik qyzmeti ustalǵan kúdiktiler Kremldiń propagandısti Vladımır Solovevti óltirmek bolǵanyn habarlady.  

– Búgin tań erteń Federaldi qaýipsizdik qyzmeti lańkestik toptyń jolyn kesip, olardyń elimizge tanymal telejýrnalısti óltirýine jol bergen joq, – dedi Pýtın.

Qazirgi tańda Reseıdiń memlekettik arnalary bul iske Batys elderiniń qatysy bar ekenin aıtyp, dabyl qaǵyp, aqparat taratýda. Óz kezeginde Pýtın bul iske AQSH-tyń Ortalyq barlaý qyzmeti men Ýkraınanyń qaýipsizdik qyzmeti tikeleı qatysy bar ekenin aıtty.

Reseıdiń Federaldi qaýipsizdik qyzmeti lańkestik áreketti júzege asyrmaq bolǵan Reseı azamatyn ustaǵandaryn, ony ásireultshyl baǵyttaǵy National Socialism/White Power dep atalatyn uıymǵa qatysy bar ekeni jaıynda aqparat taratty. Ustalǵandar oı-josparyn iske asyrǵannan keıin shetelge qashpaq bolypty.

Qaýipsizdik qyzmeti lańkesterdi ustaǵan úıge tintý júrgizgende qoldan jasalǵan jarylys quraly, Molotov kokteıli, alty tapansha, RGD-5 granaty, túrli kalıbrli myńdaǵan patron, Ýkraına tólqujaty, ásireultshyldyqty dáripteıtin ádebıetter men atrıbýtıkalar tabylǵanyn málimdedi.