Almaty qalasynyń prokýratýrasy jýrnalist Aleksandra Sentsovaǵa (Aliohova) qatysty shyǵarylǵan úkimge apelliatsiialyq ótinishhat engizip, jazany jeńildetýdi surady, dep habarlaidy dalanews.kz.
Qadaǵalaý organynyń málimetinshe, Sentsova buryn sottalmaǵan, qylmystyq jaýapkershilikke alǵash ret tartylyp otyr, kámeletke tolmaǵan balasy bar jáne turǵylyqty jeri boiynsha oń minezdemege ie. Sondai-aq onyń áreketterinde jaýapkershilikti aýyrlatatyn mán-jailar anyqtalmaǵan.
Osyǵan bailanysty prokýratýra sottan taǵaiyndalǵan jazany jeńildetýdi surap, apelliatsiialyq ótinishhat joldaǵan.
Prokýratýra ókilderi bul másele boiynsha túpkilikti sheshimdi sot qabyldaitynyn atap ótti.
Eske salaiyq, 3 tamyz kúni Almaty qalasynyń Almaly aýdandyq soty jýrnalist Aleksandra Aliohovany úsh jylǵa bas bostandyǵynan aiyrý jazasyna kesken bolatyn. Alaida jaza bes jylǵa keiinge shegerilip, oǵan 2031 jylǵa deiin synaq merzimi belgilendi. Sonymen qatar sot jýrnalistiń úsh jyl boiy jýrnalistik qyzmetpen ainalysýyna tyiym saldy.
Qylmystyq is Aleksandra Aliohovanyń 2022–2024 jyldary Almatydaǵy «Kenjehan» bazarynyń jalǵa alýshylary men menshik ieleri arasyndaǵy daý týraly jariialanymdarynan keiin qozǵalǵan. Materialdarda jalǵa alýshylardyń quqyqtaryn qorǵaǵan belsendi áieldiń buryn sottalǵany jáne politsiia esebinde turǵany týraly aqparat jariialanǵan. Belsendiniń shaǵymynan keiin tergeý bul málimetterdiń jariialanýyn jeke derekterdi zańsyz taratý dep baǵalaǵan. Al qorǵaý tarapy barlyq aqparat ashyq sot derekqorlarynan alynǵanyn málimdedi.
