Prokýror Rýslan Berdenovti atty degen kúdikke ilingen Ernar Jıembaıdy qansha jylǵa sottaýdy suraǵany belgili boldy, dep habarlaıdy Dalanews.kz.
Prokýror sottan Ernar Jıenbaıdy Rýslan Berdenovke qastandyq jasady dep tanyp, ony 11 jylǵa bas bostandyǵynan aıyrýdy surady.
Buǵan deıin sot otyrysynda aıyptalýshy sheneýnikten keshirim suraǵan bolatyn.
"Men ózimdi durys istedim dep aıta almaımyn. Keshirim suraımyn. Óltirgim kelgen joq, ondaı oıym bolmaǵan. Sizge tez saýyǵyp ketýdi tileımin. Ózim jeke baryp keshirim suraımyn", – dedi aıyptalýshy.
Al Rýslan Berdenov ádil jaza taǵaıyndalýynyń mańyzdylyǵyn atap ótti.
"Jábirlenýshi retinde meniń talap etetinim – kináli adamnyń zańǵa sáıkes ádil jazaǵa tartylýy. Eger mundaı bandıtızmge búgin tosqaýyl qoımasaq, ol memlekettik qyzmettiń abyroıyna nuqsan keltiredi. Bul oq tek maǵan emes, jalpy memlekettik qyzmette júrgen árbir adamǵa qarsy baǵyttalǵan", – dedi ol sýdıaǵa.
