Májilis depýtaty Ermurat Bapi Bas prokýror Berik Asylovqa depýtattyq saýal joldap, Nurbol Nazarbaevqa qatysty daýly máselelerdi jaiyp saldy, dep habarlaidy Dalanews.kz.
Ótken aptada depýtat Rinat Zaiyt ta Nurbol Nazarbaevtyń múlkin tekserýdi surady. Ermurat Bapidiń aitýynsha, Nurbol Nazarbaevqa qarsy Májilis tarapynan nemese depýtattar ózara uiymdastyrǵan eshqandai josparly áreket joq.
"Muny tek atyshýly áýlet ókilderiniń elde 30 jylǵa jýyq jasaǵan qiianatty qysastyǵy men zańsyzdyqtarynan zardap sheken azamattarǵa qatysty ádilettilikti ornatýdyń ǵana áreketi dep túsiný kerek.Tiisti memlekettik organdarda osy depýtattyq saýaldarda qozǵalatyn máselelerge ádilettilikti qalyptastyrýǵa degen yqylasty jáne tabandy ustanym bolýy tiis dep esepteimiz. Eger múddeli quqyq qorǵaý organdary azamattar atynan joldanǵan kóz jasqa toly ótinishterdi jyly jaýyp qoiatyn bolsa, buny Prezident Toqaevtyń "Ádiletti Qazaqstandy" qalyptastyrý bastamasyna qarsy jasalǵan naqaq qastyq dep túsiný kerek!" - dedi ol.
Onyń sózinshe, ózine Nurbol Nazarbaevtyń biznesti reiderlik jolmen tartyp alý áreketterine qatysty buǵan deiin de birneshe ótinish kelip túsken. Olardyń birqataryn buryn jazbasha túrde Bas prokýrordyń atyna joldaǵan.
"Ádilet izdegen bir emes, ekeý emes, bir myńnan asa adamnan – Almaty oblysy, Qarasai aýdany, burynǵy Kamenskoe mal asyldandyrý zaýyty jumysshylarynyń atynan kelip túsken ótinishti men úsh ret depýtattyq saýal retinde joldaǵanym osynda otyrǵan áriptesterimniń esinde bolar. "Myqtynyń arty diirmen tartady" degendei, aǵasyn arqalanǵan Nurbol Nazarbaev búkil bir keńshar jumysshylarynyń jekeshelendirýge berilgen 9 myń gektardan asa jer úlesin tartyp alǵany jónindegi meniń depýtattyq saýalym Bas prokýrordyń aldynda da sóz bolǵan edi. Biraq odan ádiletke laiyq nátije bolmady.
Mine, sol "myqty" Nurbol Nazarbaev jasaǵan zorlyqtan arasha surap, reiderlik jolmen tartyp alynǵan biznesin qaitaryp berýdi ótingen qaraǵandylyq Qýat Ermentaev degen azamattan taǵy da ótinish tústi. Bul jigit sol reiderlik shabýyldan keiin barlyq múlkinen aiyrylyp, taqyrǵa otyryp qalǵan", - deidi Bapi.
Depýtattyń sózinshe, bir qyzyǵy, ótinish berýshiniń talaby boiynsha 2022 jyly Almaty qalasynyń prokýratýrasy men Almaty qalasy boiynsha ekonomikalyq tergep-tekserý departamenti onyń múlkin, atap aitqanda "PORUS" JShS-degi úlesin reiderlik basyp alý faktisi boiynsha qylmystyq is qozǵaǵan eken.
"Biraq belgili sebepterge bailanysty men ol kezde reiderlik basyp alý Nurbol Nazarbaevtyń nusqaýy boiynsha jasaldy dep aita almadym" deidi meniń depýtattyq qabyldaýymda bolǵan ótinish iesi. Biraq arada eki jyl ótkende, iaǵni 2024 jyly Almaty qalasynyń prokýratýrasy qozǵalǵan qylmystyq isti "qylmys quramynyń bolmaýyna bailanysty" degen jeleýmen toqtatqan. Sebebi aitpasada da túsinikti: prokýratýra Nazarbaevtardyń degenin oryndaǵan. ...Zańsyzdyqtan zábir kórgen azamattarǵa qorǵan bolaiyq, Bas prokýror myrza!" - dedi ol.
