Atyraý qalalyq prokýratýrasy bloger Quralai Bolatova taratqan, “kúdiktilerdiń biri prokýratýra qyzmetkeriniń týysy” degen aqparatty resmi túrde joqqa shyǵardy, dep habarlaidy Dalanews.kz.
Resmi habarlamada prokýrorlar bul málimettiń shyndyqqa janaspaitynyn atap ótken.
«Qylmystyq iske qatysy bar eshbir tulǵa prokýratýra qyzmetkerlerimen týystyq bailanysta emes», – delingen málimdemede.
Prokýratýra azamattardy tergeý astynda júrgen adamnyń shyndyqqa sáikes kelmeitin málimdemelerine senbeýge shaqyrdy.
Qazir is boiynsha tergeý jalǵasyp jatyr. Politsiianyń habarlaýynsha, kúdiktilerdiń biri ustalyp, ýaqytsha ustaý izoliatoryna qamalǵan. Al ekinshisi qala aýmaǵynan tabylmaǵandyqtan, izdeý jariialanǵan.
Qylmystyq is QR Qylmystyq kodeksiniń «Adam urlaý» jáne «Densaýlyqqa ortasha aýyrlyqtaǵy ziian keltirý» baptary boiynsha tergelip jatyr.
Eske salaiyq, buǵan deiin bloger Quralai Bolatova tanystarynyń ony aldap, ziratqa aparyp soqqyǵa jyqqanyn málimdegen bolatyn. Onyń aitýynsha, janjaldyń sebebi 100 myń teńgege bailanysty týǵan.
