Memleket basshysy Jetisý oblysyna jasaǵan jumys saparynyń basy kórnekti etnograf, folklortanýshy, aǵartýshy-ǵalym Shoqan Ýálihanovtyń beiitine ziiarat etýden bastaldy.
Budan keiin Qasym-Jomart Toqaev Shoqan Ýálihanov atyndaǵy «Altynemel» memorialdyq mýzeiine bardy. Mýzeide Prezidentke Shoqan Ýálihanovtyń ómiri men eńbek joly, áskeri qyzmeti, tarihi-etnografiialyq, georafiialyq zertteýleri jáne ǵumyrynyń sońǵy kezeńi týraly tarihi derekter men jádigerler tanystyryldy.
Qasym-Jomart Toqaev Shoqan Ýálihanov jaily jazylǵan eńbekterdiń bárin oqyp shyqqanyn eske alyp, onyń zertteý jumystarymen tanys ekenin tilge tiek etti. Sonymen qatar Prezident mýzeidegi jádigerlerdi áli de tolyqtyra túsý kerek ekenine nazar aýdardy. Óz kezeginde Qasym-Jomart Kemeluly Qurmetti qonaqtar kitabyna qoltańbasyn qaldyryp, mýzei qyzmetkerlerimen áńgimelesti.
Jetisý oblysy ákiminiń orynbasary Rýstam Álidiń aitýynsha, búginde óńirde týrizm salasynyń damýyna qatysty negizgi kórsetkishterde ósim baiqalýda. Sońǵy úsh jylda óńirge kelgen týrister sany eki ese artqan. Al osy saladaǵy kórsetiletin qyzmetter kólemi 16 milliard teńgege deiin ósti. Búginde atalǵan baǵyttyń damýyna tyń serpin berý úshin birqatar infraqurylymdyq joba júzege asyrylyp jatyr.
Atap aitqanda, qazir Alakólge kóliktiń birneshe túrimen jetýge bolady. Byltyr Úsharal áýejaiynyń ushý-qoný jolaǵyna rekonstrýktsiia jasalyp, turaqty áýe qatynasy jolǵa qoiyldy. Biyl «Astana – Dostyq» baǵyty boiynsha «Talgo» poiyzy iske qosyldy jáne «Úsharal – Dostyq» avtojolynyń rekonstrýktsiiasy aiaqtaldy. Qazirgi kezde «Taldyqorǵan – Qalbataý – Óskemen» avtojolyn qaita jóndeý, Alakól kýrorttyq aimaǵynda joǵary voltty elektr jelilerin tartý jumystary júrgizilip jatyr.
«Altyn-Emel», «Jońǵar Alataýy» ulttyq tabiǵi parkterinde ekologiialyq týrizmge basymdyq beriledi. Biyl «Altynemel» vizit-ortalyǵy ashyldy. Al «Jońǵar Alataýy» ulttyq parkiniń aýmaǵynda jalpy quny 1,7 milliard teńge bolatyn 8 investitsiialyq joba júzege asyrylmaq.
Sonymen qatar Tekeli mańaiynda shańǵy-biatlon keshenin salý jáne Burqanbulaq sarqyramasyna deiingi joldy jóndeý jumystary josparlanǵan.
Memleket basshysy týristik-demalys aimaqtaryna injenerlik-kommýnikatsiialyq jeli júrgizýmen jáne abattandyrýmen belsendi túrde ainalysyp, oblystyń týristik áleýetin arttyrý qajet ekenin aitty.
– Jalpy, oblysta týristik nysandar jetkilikti. Sondyqtan onyń bárine tiisti deńgeide mán berip, damytý kerek. Týrizm Jetisý oblysy ekonomikasynyń basym baǵyty bolýǵa tiis. Týrister neǵurlym kóbirek kelse, oblysqa da oń septigin tigizedi. Oblystyń týrizm salasyndaǵy áleýeti óte zor, – dedi Prezident.
