"Ádiletti Qazaqstandy qurý jolynda túbegeıli jáne jan-jaqty reformalardy tabysty júzege asyrý úshin halyqtyń jańa senim mandaty qajet. Men úshin memleket múddesi bárinen bıik.
Sondyqtan men ókilettik merzimimdi qysqartýǵa jáne kezekten tys Prezıdent saılaýyna barýǵa daıynmyn.
Sondaı-aq, men kóp oılanyp, Prezıdent ókilettigi merzimderiniń sanyn jáne uzaqtyǵyn qaıta qaraý qajet degen baılamǵa keldim. Prezıdent mandatyn uzaqtyǵy 7 jyldyq bir merzimmen shekteýdi usynamyn. Biraq qaıta saılanýǵa tyıym salynady», – dedi Qasym-Jomart Kemeluly.
Osy rette Dalanews.kz qoǵam belsendisi Ádil Saılaýbekpen pikirlesken bolatyn.
«Prezıdent óziniń Joldaýynda ókilettigin toqtatyp, kelesi saılaýǵa qatysatynyn málimdedi. Ereksheligi 7 jyldyq bir merzimge saılanýy. Bul sýper prezıdenttikten, qazirgi demokratıalandyrǵan kezeńge kóshýdiń bir belgisi dep oılaımyn. Aldaǵy ýaqyttaǵy kezekten tys prezıdent saılaýy ádil ótedi degen senimdemin», – dedi Ádil myrza.
Qasym-Jomart Kemelulynyń 7 jyldyq bir merzimge prezıdentterdiń saılanýyn bul bolashaq Memleket basshylaryna jasaǵan qadamy dep sanaıdy saıasattanýshy Samat Nurtaza.
«Toqaev ózderińiz bilesizder uzaq otyrǵan adamdarmen birge jumys istedi ǵoı. Sondyqtanda 7 jyl bir adamǵa reformany jasaýǵa jetkilikti degen fılosofıasy bolýy múmkin. Jáne totalıtarızm, dıktatýra, jeke basqa tabyný bolyp ketpesi úshin jasalǵan qadamnyń biri de bolýy yqtımal. Demek, qazirgi memleket basshysynan keıin keletin prezıdentter de uzaq bılikte otyra almaı, demokratıalyq júıe qalyptasatyn bolady», – dedi Samat myrza.
Sondaı-aq saıasattanýshy bul Memleket basshysynyń el úshin jasaǵan qurbandyǵy dep túsindirip, kezekten tys saılaý qanshalyqty mańyzdy degen saýalǵa bylaısha jaýap qatty.
«Qazir bılikte Senatta, Májiliste, basqa basshylyq ishinde áli kúnge deıin eski Qazaqstannyń adamdary bar ekenin bárimiz bilemiz. Endi sol eski kadrlardyń ornyna jańa adamdardyń kelýi, ári óziniń bıligin legıtımdi etý úshin, bir serpilis kerek boldy. Sol úshin prezıdent el úshin óziniń 2 jylyn qurbandyqqa shalyp, qysqartyp otyr. 2024 jylǵa deıin otyra berse, eshkim ket demes edi. Tolyq otyrýǵa quqyǵy bar» dedi Samat Nurtaza.
Nursultan Nazarbaev prezıdenttikten ketken kezde, kóz jasyn tıa almaı, qımaı qoshtasqan «Aq jol» partıasynyń tóraǵasy Azat Perýashev myrza Prezıdent saılaýynda memleket basshysy Qasym-Jomart Toqaevqa laıyqty qarsylastar bolatynyn málim etti. Kim biledi. Áliptiń artyn baǵaıyq.
