"ادىلەتتى قازاقستاندى قۇرۋ جولىندا تۇبەگەيلى جانە جان-جاقتى رەفورمالاردى تابىستى جۇزەگە اسىرۋ ءۇشىن حالىقتىڭ جاڭا سەنىم مانداتى قاجەت. مەن ءۇشىن مەملەكەت مۇددەسى بارىنەن بيىك.
سوندىقتان مەن وكىلەتتىك مەرزىمىمدى قىسقارتۋعا جانە كەزەكتەن تىس پرەزيدەنت سايلاۋىنا بارۋعا دايىنمىن.
سونداي-اق، مەن كوپ ويلانىپ، پرەزيدەنت وكىلەتتىگى مەرزىمدەرىنىڭ سانىن جانە ۇزاقتىعىن قايتا قاراۋ قاجەت دەگەن بايلامعا كەلدىم. پرەزيدەنت مانداتىن ۇزاقتىعى 7 جىلدىق ءبىر مەرزىممەن شەكتەۋدى ۇسىنامىن. ءبىراق قايتا سايلانۋعا تىيىم سالىنادى»، – دەدى قاسىم-جومارت كەمەل ۇلى.
وسى رەتتە Dalanews.kz قوعام بەلسەندىسى ءادىل سايلاۋبەكپەن پىكىرلەسكەن بولاتىن.
«پرەزيدەنت ءوزىنىڭ جولداۋىندا وكىلەتتىگىن توقتاتىپ، كەلەسى سايلاۋعا قاتىساتىنىن مالىمدەدى. ەرەكشەلىگى 7 جىلدىق ءبىر مەرزىمگە سايلانۋى. بۇل سۋپەر پرەزيدەنتتىكتەن، قازىرگى دەموكراتيالاندىرعان كەزەڭگە كوشۋدىڭ ءبىر بەلگىسى دەپ ويلايمىن. الداعى ۋاقىتتاعى كەزەكتەن تىس پرەزيدەنت سايلاۋى ءادىل وتەدى دەگەن سەنىمدەمىن»، – دەدى ءادىل مىرزا.
قاسىم-جومارت كەمەل ۇلىنىڭ 7 جىلدىق ءبىر مەرزىمگە پرەزيدەنتتەردىڭ سايلانۋىن بۇل بولاشاق مەملەكەت باسشىلارىنا جاساعان قادامى دەپ سانايدى ساياساتتانۋشى سامات نۇرتازا.
«توقايەۆ وزدەرىڭىز بىلەسىزدەر ۇزاق وتىرعان ادامدارمەن بىرگە جۇمىس ىستەدى عوي. سوندىقتاندا 7 جىل ءبىر ادامعا رەفورمانى جاساۋعا جەتكىلىكتى دەگەن فيلوسوفياسى بولۋى مۇمكىن. جانە توتاليتاريزم، ديكتاتۋرا، جەكە باسقا تابىنۋ بولىپ كەتپەسى ءۇشىن جاسالعان قادامنىڭ ءبىرى دە بولۋى ىقتيمال. دەمەك، قازىرگى مەملەكەت باسشىسىنان كەيىن كەلەتىن پرەزيدەنتتەر دە ۇزاق بيلىكتە وتىرا الماي، دەموكراتيالىق جۇيە قالىپتاساتىن بولادى»، – دەدى سامات مىرزا.
سونداي-اق ساياساتتانۋشى بۇل مەملەكەت باسشىسىنىڭ ەل ءۇشىن جاساعان قۇرباندىعى دەپ ءتۇسىندىرىپ، كەزەكتەن تىس سايلاۋ قانشالىقتى ماڭىزدى دەگەن ساۋالعا بىلايشا جاۋاپ قاتتى.
«ءقازىر بيلىكتە سەناتتا، ماجىلىستە، باسقا باسشىلىق ىشىندە ءالى كۇنگە دەيىن ەسكى قازاقستاننىڭ ادامدارى بار ەكەنىن ءبارىمىز بىلەمىز. ەندى سول ەسكى كادرلاردىڭ ورنىنا جاڭا ادامداردىڭ كەلۋى، ءارى ءوزىنىڭ بيلىگىن لەگيتيمدى ەتۋ ءۇشىن، ءبىر سەرپىلىس كەرەك بولدى. سول ءۇشىن پرەزيدەنت ەل ءۇشىن ءوزىنىڭ 2 جىلىن قۇرباندىققا شالىپ، قىسقارتىپ وتىر. 2024 جىلعا دەيىن وتىرا بەرسە، ەشكىم كەت دەمەس ەدى. تولىق وتىرۋعا قۇقىعى بار» دەدى سامات نۇرتازا.
نۇرسۇلتان نازاربايەۆ پرەزيدەنتتىكتەن كەتكەن كەزدە، كوز جاسىن تيا الماي، قيماي قوشتاسقان «اق جول» پارتياسىنىڭ ءتوراعاسى ازات پەرۋاشيەۆ مىرزا پرەزيدەنت سايلاۋىندا مەملەكەت باسشىسى قاسىم-جومارت توقايەۆقا لايىقتى قارسىلاستار بولاتىنىن ءمالىم ەتتى. كىم بىلەدى. ءالىپتىڭ ارتىن باعايىق.
