Prezidenttik kadr rezervi jastardyń boiyna senim uialatty
Táýelsizdik jyldary elimizde bilimdi jastardyń úlken shoǵyry qalyptasty. Osyǵan deiin olardyń bilik basyna baryp, memleket basqarý isine aralasýyna múmkindigi bolamady. Al Prezidenttik jastar kadrlyq rezervi júzege asa bastaǵannan keiin talantty jastarǵa jol ashyldy.
Qazir memlekettik qyzmet qoly uzyn adamdardyń ul-qyzdary ǵana ainalysatyn dúnie emes. Buǵan deiin iri shendilerdiń balalary ǵana memlekettik qyzmettiń jalyna jarmasyp, jaily kabinetterde jumys istep kelgenin bilemiz. Qazir bilimi men biliktiligi qyzmetine sai adamdar bir orynda uzaq aialdai almaityn kún týdy.
Memlekettik deńgeide qabyldanǵan Kadrlyq rezerv jobasy memlekettik qyzmet salasynda básekelestik ortany qalyptastyryp, salanyń jańǵyrýyna negiz bolǵany anyq.
Memleket basshysy Qasym-Jomart Toqaev óziniń alǵashqy Joldaýynda «sabaqtastyq, órleý» dep barshamyzdyń aldymyzǵa úlken maqsat qoiyp, talantty jastardy memlekettik qyzmetke tartýǵa basa mán berdi. Jastar Prezident Toqaevtyń qolǵa alǵan saiasi-ekonomikalyq reformalaryn alǵa súireitin negizgi kúshke ainalýy tiis. Qasym-Jomart Toqaev Prezidenttik jastar kadrlyq rezervin qolǵa alǵanda osyndai maqsatty kózdegeni anyq.
Prezidenttik jastar kadrlyq rezervine 35 jasqa deiinge joǵary bilimi bar, kez kelgen salada bes jyldyq jumys ótili bar jastar qatysyp, ózderiniń baqtaryn synai alady.
Joba qolǵa alynǵan 2019 jyly kadrlyq rezervke elimiz boiynsha 8 myńnan astam jastar ótinish bergen edi. Osydan-aq jastar arasynda memlekettik qyzmetke degen qyzyǵýshylyqtyń zor ekenin baiqadyq.
Búginde Kadrlyq rezerv jobasynan súrinbei ótken 350 jas Úkimet pen jergilikti ózin-ózi basqarý salasynda el damýy jolynda qyzmet etip jatyr. Olardyń aldy vitse-ministr qyzmetine deiin taǵaiyndalǵanyn da airyqsha atap aitýǵa bolady.
Prezidenttik kadrlyq rezerv jobasyn sátti júzege asyrǵan QR Memlekettik qyzmet ister jónindegi agenttiktiń tóraǵasy Darhan Jazyqbaev qazirgi tańda jastardy memlekettik qyzmetke tartý isi keń kólemde júzege asa bastaǵanyn Dalanews.kz aqparattyq agenttigine áńgimelep berdi.
– Prezidenttik jastar kadrlyq rezervi joǵary laýazymdy qyzmetterge talantty jastardy tartýda el úmitin aqtaǵan joba boldy desem qatelespeimin. Osy jobanyń arqasynda jastardyń boiynda senim paida bolady. Irikteýden súrinbei ótken jastarymyz joǵary laýazymdy qyzmetterdi abyroiymen atqaryp, elimizdiń damýyna óz úlesterin qosýda.
Jastardy memlekettik qyzmetke tartýdyń tiimdiligin eskergen Memleket basshysy bizdiń agenttikke memlekettik qyzmetke jastardy qabyldaýdyń tiimdi joldaryn damytý týrasynda tapsyrma bergen bolatyn. Budan keiin joǵary oqý oryndarynda sońǵy kýrsta oqyp júrgen jastardyń oqý bitirgennen keiin aýyl men aýdandyq deńgeidegi ákimdikterdegi tómengi laýazymdy qyzmetterge eshqandai memlekettik-konkýrstyq baiqaýsyz jumysqa turýyna múmkindik beretin júie daiyndadyq. Bul úshin bizder jastardyń bilimine basa mán beremiz. Memleket jyl saiyn bilim berý granttary úshin qyrýar qarjy bólip keledi. Oqýyn jaqsy aiaqtaǵan jastar endi qaida baryp jumys isteimin dep alańdamasa da bolady.
Bizder bul bastamany osyǵan deiin qabyldanǵan «Diplommen aýylǵa» baǵdarlamasymen bailanystyryp otyrmyz. Osylaisha, oqýyn jaqsy aiaqtaǵan jastar konkýrstyq irikteýsiz jumysqa turdy ári «Diplommen aýylǵa» baǵdarlamasynyń igiligin kóre alady, – deidi Darhan Jazyqbaev myrza.
Toqaev bilik tizginin qolǵa alǵan kúnnen bastap eski kadrlardy jańa kadrlamen almastyrý týrasyndaǵy áńgimeler áleýmettik jelide biraz sóz bolǵany belgili. Jańa kadrlardy daiyndaý bir kúnde sheshiletin dúnie emes. Bul júieli áreketti qajet etetin sala. Aldaǵy ýaqytta Prezidenttik kadr rezervine ilikken jastardyń bári bilik oryndaryna baryp, Jańa Qazaqstandy qurý jolynda aianbai ter tógetin bolady. Sondyqtan bul jobanyń el damýyna serpin beretin kúni alys emes.
Qýanysh SMAǴUL
