تاۋەلسىزدىك جىلدارى ەلىمىزدە ءبىلىمدى جاستاردىڭ ۇلكەن شوعىرى قالىپتاستى. وسىعان دەيىن ولاردىڭ بيلىك باسىنا بارىپ، مەملەكەت باسقارۋ ىسىنە ارالاسۋىنا مۇمكىندىگى بولامادى. ال پرەزيدەنتتىك جاستار كادرلىق رەزەرۆى جۇزەگە اسا باستاعاننان كەيىن تالانتتى جاستارعا جول اشىلدى.
ءقازىر مەملەكەتتىك قىزمەت قولى ۇزىن ادامداردىڭ ۇل-قىزدارى عانا اينالىساتىن دۇنيە ەمەس. بۇعان دەيىن ءىرى شەندىلەردىڭ بالالارى عانا مەملەكەتتىك قىزمەتتىڭ جالىنا جارماسىپ، جايلى كابينەتتەردە جۇمىس ىستەپ كەلگەنىن بىلەمىز. ءقازىر ءبىلىمى مەن بىلىكتىلىگى قىزمەتىنە ساي ادامدار ءبىر ورىندا ۇزاق ايالداي المايتىن كۇن تۋدى.
مەملەكەتتىك دەڭگەيدە قابىلدانعان كادرلىق رەزەرۆ جوباسى مەملەكەتتىك قىزمەت سالاسىندا باسەكەلەستىك ورتانى قالىپتاستىرىپ، سالانىڭ جاڭعىرۋىنا نەگىز بولعانى انىق.
مەملەكەت باسشىسى قاسىم-جومارت توقايەۆ ءوزىنىڭ العاشقى جولداۋىندا «ساباقتاستىق، ورلەۋ» دەپ بارشامىزدىڭ الدىمىزعا ۇلكەن ماقسات قويىپ، تالانتتى جاستاردى مەملەكەتتىك قىزمەتكە تارتۋعا باسا ءمان بەردى. جاستار پرەزيدەنت توقايەۆتىڭ قولعا العان ساياسي-ەكونوميكالىق رەفورمالارىن العا سۇيرەيتىن نەگىزگى كۇشكە اينالۋى ءتيىس. قاسىم-جومارت توقايەۆ پرەزيدەنتتىك جاستار كادرلىق رەزەرۆىن قولعا العاندا وسىنداي ماقساتتى كوزدەگەنى انىق.
پرەزيدەنتتىك جاستار كادرلىق رەزەرۆىنە 35 جاسقا دەيىنگە جوعارى ءبىلىمى بار، كەز كەلگەن سالادا بەس جىلدىق جۇمىس ءوتىلى بار جاستار قاتىسىپ، وزدەرىنىڭ باقتارىن سىناي الادى.
جوبا قولعا الىنعان 2019 جىلى كادرلىق رەزەرۆكە ەلىمىز بويىنشا 8 مىڭنان استام جاستار ءوتىنىش بەرگەن ەدى. وسىدان-اق جاستار اراسىندا مەملەكەتتىك قىزمەتكە دەگەن قىزىعۋشىلىقتىڭ زور ەكەنىن بايقادىق.
بۇگىندە كادرلىق رەزەرۆ جوباسىنان سۇرىنبەي وتكەن 350 جاس ۇكىمەت پەن جەرگىلىكتى ءوزىن-وزى باسقارۋ سالاسىندا ەل دامۋى جولىندا قىزمەت ەتىپ جاتىر. ولاردىڭ الدى ۆيسە-مينيستر قىزمەتىنە دەيىن تاعايىندالعانىن دا ايرىقشا اتاپ ايتۋعا بولادى.
پرەزيدەنتتىك كادرلىق رەزەرۆ جوباسىن ءساتتى جۇزەگە اسىرعان ق ر مەملەكەتتىك قىزمەت ىستەر جونىندەگى اگەنتتىكتىڭ ءتوراعاسى دارحان جازىقبايەۆ قازىرگى تاڭدا جاستاردى مەملەكەتتىك قىزمەتكە تارتۋ ءىسى كەڭ كولەمدە جۇزەگە اسا باستاعانىن Dalanews.kz اقپاراتتىق اگەنتتىگىنە اڭگىمەلەپ بەردى.
– پرەزيدەنتتىك جاستار كادرلىق رەزەرۆى جوعارى لاۋازىمدى قىزمەتتەرگە تالانتتى جاستاردى تارتۋدا ەل ءۇمىتىن اقتاعان جوبا بولدى دەسەم قاتەلەسپەيمىن. وسى جوبانىڭ ارقاسىندا جاستاردىڭ بويىندا سەنىم پايدا بولادى. ىرىكتەۋدەن سۇرىنبەي وتكەن جاستارىمىز جوعارى لاۋازىمدى قىزمەتتەردى ابىرويىمەن اتقارىپ، ەلىمىزدىڭ دامۋىنا ءوز ۇلەستەرىن قوسۋدا.
جاستاردى مەملەكەتتىك قىزمەتكە تارتۋدىڭ تيىمدىلىگىن ەسكەرگەن مەملەكەت باسشىسى ءبىزدىڭ اگەنتتىككە مەملەكەتتىك قىزمەتكە جاستاردى قابىلداۋدىڭ ءتيىمدى جولدارىن دامىتۋ تۋراسىندا تاپسىرما بەرگەن بولاتىن. بۇدان كەيىن جوعارى وقۋ ورىندارىندا سوڭعى كۋرستا وقىپ جۇرگەن جاستاردىڭ وقۋ بىتىرگەننەن كەيىن اۋىل مەن اۋداندىق دەڭگەيدەگى اكىمدىكتەردەگى تومەنگى لاۋازىمدى قىزمەتتەرگە ەشقانداي مەملەكەتتىك-كونكۋرستىق بايقاۋسىز جۇمىسقا تۇرۋىنا مۇمكىندىك بەرەتىن جۇيە دايىندادىق. بۇل ءۇشىن بىزدەر جاستاردىڭ بىلىمىنە باسا ءمان بەرەمىز. مەملەكەت جىل سايىن ءبىلىم بەرۋ گرانتتارى ءۇشىن قىرۋار قارجى ءبولىپ كەلەدى. وقۋىن جاقسى اياقتاعان جاستار ەندى قايدا بارىپ جۇمىس ىستەيمىن دەپ الاڭداماسا دا بولادى.
بىزدەر بۇل باستامانى وسىعان دەيىن قابىلدانعان «ديپلوممەن اۋىلعا» باعدارلاماسىمەن بايلانىستىرىپ وتىرمىز. وسىلايشا، وقۋىن جاقسى اياقتاعان جاستار كونكۋرستىق ىرىكتەۋسىز جۇمىسقا تۇردى ءارى «ديپلوممەن اۋىلعا» باعدارلاماسىنىڭ يگىلىگىن كورە الادى، – دەيدى دارحان جازىقبايەۆ مىرزا.
توقايەۆ بيلىك تىزگىنىن قولعا العان كۇننەن باستاپ ەسكى كادرلاردى جاڭا كادرلامەن الماستىرۋ تۋراسىنداعى اڭگىمەلەر الەۋمەتتىك جەلىدە ءبىراز ءسوز بولعانى بەلگىلى. جاڭا كادرلاردى دايىنداۋ ءبىر كۇندە شەشىلەتىن دۇنيە ەمەس. بۇل جۇيەلى ارەكەتتى قاجەت ەتەتىن سالا. الداعى ۋاقىتتا پرەزيدەنتتىك كادر رەزەرۆىنە ىلىككەن جاستاردىڭ ءبارى بيلىك ورىندارىنا بارىپ، جاڭا قازاقستاندى قۇرۋ جولىندا ايانباي تەر توگەتىن بولادى. سوندىقتان بۇل جوبانىڭ ەل دامۋىنا سەرپىن بەرەتىن كۇنى الىس ەمەس.
قۋانىش سماعۇل
