Ulttyq ekonomika ministrligi aldaǵy úsh jylǵa arnalǵan respýblikalyq biýdjetti qalyptastyrý barysynda shyǵyndardy qysqartýǵa kiristi, dep habarlaidy Dalanews.kz.
Bul týraly ministrlik ótkizgen keńeste málim boldy. Naqty sheshimderdiń biri — tiimsiz jáne ónimsiz shyǵyndardy azaitý.
Serik Jumanǵarin basqaratyn vedomstvonyń habarlaýynsha, únemdeýdiń basty baǵyty – qajetsiz sharalardan bas tartý. Atap aitqanda, seminarlar, kórmeler men konferentsiialar uiymdastyrý, konsalting qyzmetterin satyp alý, ákimshilik ǵimarattar salý, avtokólik satyp alý jáne kúrdeli shyǵyndar toqtatylady.
Sonymen qatar, Ulttyq ekonomika ministrligi Qarjy ministrligimen birlesip, basqa da biýdjet baptaryn qaita qarap, qosymsha rezerv kózderin izdestirip jatyr. Bul týraly ministrlik taratqan resmi habarlamada jalpy sipatta aitylǵan.
Toqaev ne dep edi?
Eske salaiyq, Prezident Qasym-Jomart Toqaev Úkimettiń keńeitilgen otyrysynda reformalardyń naqty baǵyty men ony júzege asyrý joldary týraly aitqan bolatyn.
"Úkimet el ekonomikasyn turalap qalýdan saqtap, ornyqty damýdy qamtamasyz etý úshin kúrdeli sheshimder qabyldaýy kerek jáne eń bastysy sol sheshimderdi iske asyrýǵa tiis. Bul – joǵary bilikti ári jaýapkershilik alýǵa daiyn memlekettik qyzmetshilerdiń qolynan keletin jumys. Álemdik tájiribege qarasaq, memlekettik apparattyń tiimdiligi osyndai kúrdeli kezeńderde aiqyn kórinedi.
Úkimet qanshalyqty qiyn bolsa da, jappai únemdeýge kóship, biýdjet qarjysyn tek qana asa ózekti máselelerdi sheshýge jumsaýy kerek. Kórpege qarai kósiletin ýaqyt keldi. Orynsyz shyǵyndy toqtatyp, aiaǵymyzdy tartyp basý qajet", degen edi Memleket basshysy.
