Búgin Memleket basshysy Ulttyq quryltaidyń IV otyrysynda kótergen bastamalardy júzege asyrý týraly josparǵa qol qoidy. 53 tarmaqtan turatyn bul qujatty Prezident Ákimshiligi Úkimetpen birlesip ázirledi.
Memlekettik keńesshi Erlan Qarin Prezidenttiń Ulttyq quryltaida bergen tapsyrmalary elimizdiń uzaq merzimge arnalǵan damý baǵdaryn aiqyndaitynyn málimdedi, – dep habarlaidy Dalanews.kz.
Josparda Prezidenttiń gýmanitarlyq jáne áleýmettik-ekonomikalyq salalardaǵy tapsyrmalaryn oryndaýǵa qatysty naqty qadamdar kózdelgen.
Memleket basshysynyń gýmanitarlyq bastamalaryn júzege asyrý úshin:
● «Qazaqstan balalary» biryńǵai baǵdarlamasyn ázirleý;
● Ishki saiasat tujyrymdamasyn ázirleý jáne bekitý;
● Nashaqorlyqqa jáne esirtki biznesine qarsy kúrestiń 2026-2028 jyldarǵa arnalǵan jańa keshendi josparyn qabyldaý,
● Ulttyq tsifrlyq arhiv qurý;
● biznes ókilderin tarta otyryp aimaqtarda teatrlardy salý jáne damytý, sondai-aq ulttyq teatrlarǵa qoldaý kórsetý;
● Shetelde Abai institýtyn ashý;
● Halyqaralyq biologiialyq áralýandyqty qorǵaý qoryn qurý qarastyrylǵan.
Erlan Qarin áleýmettik-ekonomikalyq jobalardyń ishinen mynalardy atap ótti:
● «Jaily mektep» ulttyq jobasyn júzege asyrýdy jalǵastyrý, úsh jylda 1300 mektepti jańǵyrtý;
● erekshe qajettiligi bar adamdarǵa arnalǵan zamanaýi ońaltý ortalyqtaryn ashý, árbir oblys ortalyǵynda erekshe qajettiligi bar balalardy ońaltý jáne damytý ortalyqtaryn qurý;
● Óńirlerdi damytý tujyrymdamasyna qatysty tyń tásilderdi engizý;
● 2025-2026 jyldary iri infraqurylymdyq jobalardy júzege asyrý, sonyń ishinde Astanadan Arqalyq, Torǵai jáne Yrǵyz arqyly Transkaspii halyqaralyq kólik dálizine týra shyǵatyn avtokólik jolyn salý jáne jańǵyrtý, Arqalyqtaǵy áýejaidy qalpyna keltirý jáne jańa aerovokzal keshenin salý;
● aldaǵy tórt jyl ishinde elimizde jyl saiyn 200-ge jýyq investitsiialyq jobany iske qosý. Sonymen qatar shekara mańyndaǵy aýdandardy damytý, ǵylym qalashyqtaryn qurý, erekshe qajettilikteri bar balalardy keshendi qoldaý, úkimettik emes uiymdar jáne memlekettik áleýmettik tapsyrys týraly jeke zańdar qabyldanady.
"Prezidenttiń Ulttyq quryltaidyń IV otyrysynda kótergen bastamalary men bergen tapsyrmalary memlekettik organdar úshin de, búkil qoǵam úshin de elimizdiń uzaq merzimge arnalǵan damý baǵdaryn aiqyndaidy", - dedi Erlan Qarin.
