Prezident Toqaev Almaty ákimine birqatar tapsyrma berdi
«Qala ákimi Prezidentke ekonomikanyń turaqty ósimin qamtamasyz etý jónindegi tapsyrmalarynyń oryndalýy jóninde baiandady. Esep berilip otyrǵan kezeńde qysqamerzimdi ekonomikalyq indikator 105 paiyzǵa jetken. Óńdeýshi ónerkásip – ósimniń negizgi draiverine ainaldy.
Negizgi kapitalǵa salynǵan investitsiia kólemi 22,1 paiyzǵa artqan. Almaty jeke investitsiialar kólemi jóninen (22,4 paiyz) óńirler arasynda birinshi orynda. Qalada iskerlik belsendilik qalpyna keldi. Biylǵy toǵyz aida jumys isteitin shaǵyn jáne orta biznes sýbektileriniń sany 37,2 paiyzǵa artty», - delingen habarlamada.
Qasym-Jomart Toqaevqa Almaty qalasyn damytýdyń 2025 jylǵa deiingi baǵdarlamasynyń júzege asyrylýy jáne 2030 jylǵa deiingi ortamerzimdi perspektivalary, sonymen qatar damýdyń bekitilgen negizgi basymdyqtaryn eskere otyryp, qalanyń 2040 jylǵa deiingi jańa Bas josparyn ázirleý barysy týraly baiandaldy.
Memleket basshysyna injenerlik infraqurylymdy damytý jumystary, mektepterdegi oryn tapshylyǵyn tómendetý úshin qabyldanyp jatqan sharalar, biryńǵai beinemonitoring júiesin qurý jónindegi tapsyrmasynyń oryndalý barysy týraly málimet berildi.
Kezdesý sońynda Prezident qalanyń ekonomikasyn odan ári ártaraptandyrý jáne infraqurylymyn jańǵyrtý jóninde tapsyrma berdi.
