Brifingke qatysqan «Saq» kinostýdiiasynyń direktory Nuriddin Pátteev Prezident maqalasyndaǵy qoiylǵan maqsattar tóńireginde Túrkistan oblysynda júzege asqan jobalarǵa toqtaldy.
«Ótken jyly óńirde «Rýhani jańǵyrý» baǵdarlamasy aiasynda oblys ákimi Janseiit Túimebaevtyń qoldaýymen «Kóne jetigenniń syry» atty 10 seriialy telehikaia túsirilip, kórermen qaýymǵa usynyldy. Budan ózge, «Kieli Qazyǵurt», «Otyrardy qorǵaý», «Kúsh atasy – Qajymuqan», «Báidibek bi» atty animatsiialyq filmderi respýblikalyq jáne jergilikti telearnalarda kórsetildi. Sondai-aq, «Uly Jibek jolyndaǵy eskertkishter» atty derekti film taspalanyp, kópshiliktiń nazaryna usynyldy», - dedi Nuriddin Pátteev.
Memleket basshysynyń «Uly dalanyń jeti qyry» maqalasynda: «Jalpy halyqtyń sanasynda filmderdegi jarqyn kinoobrazdar irgeli ǵylymi monografiialardaǵy derekti portretterden góri mańyzdyraq ról atqarady. Sondyqtan tez arada Qazaqstannyń órkeniet tarihynyń úzdiksiz damýyn kórsetetin derekti-qoiylymdyq filmderdiń, televiziialyq serialdar men tolyqmetrajdy kórkem kartinalardyń arnaiy tsiklin óndiriske engizý kerek. Ult qaharmandaryn úlgi tutý úrdisin qalyptastyrýǵa jol ashatyn sapaly balalar filmderi men mýltiplikatsiialyq serialdardy asa qajet etetin óskeleń urpaqtyń da talǵamyna erekshe nazar aýdarý qajet. Bizdiń dańqty batyrlarymyz, oishyldarymyz ben el bileýshilerimiz – tek Qazaqstan ǵana emes, sondai-aq búkil álem boiynsha elikteýge laiyqty tulǵalar» dep atap kórsetken.
Aǵymdaǵy jyly da oblys basshysynyń qoldaýymen óńirde «Ordabasy – birlik týy» atty animatsiialyq filmniń túsirilimi aiaqtalyp, tusaýkeseri josparlanýda. Sonymen qatar, «Túrkistan», «Oqsyz» animatsiialyq filmderi men «Tóle bi» teleserialynyń túsirilim jumystary jalǵasyp keledi.
