Memleket basshysy jańa Salyq kodeksine jáne «Qazaqstan Respýblikasynyń keibir zańnamalyq aktilerine salyq salý máseleleri boiynsha ózgerister men tolyqtyrýlar engizý týraly» Zańǵa qol qoidy, dep habarlaidy Dalanews.kz.
Salyq kodeksi salyqtyq ákimshilendirýdi jappai jeńildetýdi kózdeidi. Atap aitqanda, salyq eseptiliginiń kólemi 30 paiyzǵa qysqarady, salyqtardyń sany 20 paiyzǵa azaiady, jeńildikter men alymdar ońtailandyrylady. Eleýli ózgerister korporativtik jáne jeke tabys salyqtarynan bastap investitsiialardy yntalandyrý jáne salyq júktemesin qaita bólý sekildi barlyq negizgi baǵytty qamtidy.
Qosylǵan qun salyǵynyń (QQS) jańa bazalyq mólsherlemesi 16 paiyz bolyp bekitildi. Dári-dármek pen meditsinalyq qyzmetterge tómendetilgen QQS mólsherlemesi belgilendi: 2026 jyldan – 5 paiyz, 2027 jyldan – 10 paiyz.
Bul rette Tegin meditsinalyq kómektiń kepildik berilgen kólemi (TMKKK) men Mindetti áleýmettik meditsinalyq saqtandyrý (MÁMS) aiasyndaǵy qyzmetter, Úkimet aiqyndaityn tizbe boiynsha orfandyq jáne áleýmettik máni bar aýrýlardy emdeý, sondai-aq baspa túrindegi kitap shyǵarý, arheologiialyq jumys júrgizý qyzmetteri QQS-tan bosatylady.
Merzimdi baspa basylymdardy ótkizý boiynsha 10 paiyz deńgeiinde tómendetilgen QQS mólsherlemesi belgilenedi. QQS boiynsha mindetti esepke qoiý úshin ainalymnyń tómengi shegi 10 myń ailyq eseptik kórsetkishke (40 million teńge) deiin tómendetiledi.
Biryńǵai zeinetaqy jinaqtaýshy qorynan (BZJQ) tólenetin zeinetaqy tólemderi jeke tabys salyǵynan (JTS) bosatylady. Paidalanylý merzimi 10 jyldan joǵary avtomobilder úshin kólik quraly salyǵy tómendetildi. Múgedektigi bar adamdarǵa áleýmettik salyqtyq shegerimder 882-den 5000 AEK-ke deiin ulǵaityldy.
Salyqtardyń sany azaidy: biryńǵai jer salyǵy qysqartyldy, jeke tólemaqylar boiynsha mólsherlemeler men alymdardyń sany kemitildi.
Arnaýly salyq rejimderi ońtailandyryldy. Endi olar úsh jaǵdaida qoldanylady: ózin-ózi jumyspen qamtyǵandar úshin, ońailatylǵan deklaratsiia negizinde jáne sharýa qojalyqtary úshin.
Ózin-ózi jumyspen qamtyǵandar tólemderdi mobildik qosymsha arqyly eseptep, tólei alady.
Korporativtik tabys salyǵy (KTS) 20 paiyz deńgeiinde saqtalady. Alaida saralanǵan salyqtyq mólsherleme engiziledi
Atap aitqanda, bankter (biznes sýbektilerin kreditteýdi qospaǵanda) men oiyn biznesi úshin – 25 paiyz. Áleýmettik sala uiymdary úshin 2026 jyly 5 paiyz mólsherinde belgilenip, 2027 jyly 10 paiyzǵa deiin ulǵaiady. Aýyl sharýashylyǵy taýaryn óndirýshilerge 3 paiyz jeńildetilgen mólsherleme qalady.
Qor naryǵyn yntalandyrý úshin birjalyq qundy qaǵazdarǵa tólenetin dividentterge salyq jeńildikteri sol kúii saqtalady. «Báiterek» holdingi shyǵarǵan qundy qaǵazdardan túsetin kiris 2031 jylǵa deiin KTS-ten bosatylady. Paidaly qazbalardy óńdeý men geologiialyq barlaý salasy úshin qosymsha preferentsiialar qarastyrylǵan. Atap aitqanda, tiimdiligi tómen jańa ýchaskeler 5 jylǵa paidaly qazbalardy óndirý salyǵynan bosatylady.
Jeke tabys salyǵynyń (JTS) progressivti mólsherlemesi engiziledi. Jyldyq jalpy tabysy 8500 ailyq eseptik kórsetkishten asatyn azamattarǵa 15 paiyz salyq mólsherlemesi qoldanylady. Sol siiaqty dividentteri men tabys kólemi jylyna 230 myń AEK-ten asatyn kásipkerler osyndai mólsherde salyq tóleidi. Al fermerlerdiń osy mejeden asatyn tabysyna burynnan saqtalǵan 70 paiyz jeńildikti esepke ala otyryp, 4,5 paiyz salyq salynady.
Jeke tulǵalar úshin qymbat ónimderge, atap aitqanda quny 75 million teńgeden asatyn avtokólikterge, quny 100 million teńgeden asatyn kemelerge, ár litriniń quny 500 myń teńgeden asatyn alkogolge, ár danasynyń quny 10 myń teńgeden asatyn temeki ónimderine 10 paiyz aktsiz túrinde salyq salynady. Sonymen qatar jalpy quny 450 million teńgeden asatyn jyljymaityn múlik nysandaryna múlik salyǵy joǵarylaidy.
Salyqtyq ákimshilendirý tásilderi aitarlyqtai ózgeredi. Kameraldyq baqylaý eskertý sipatynda bolady. Salyqtyq bereshekti óndirip alý, tólemdi keiinge qaldyrý jáne bólip tóleý múmkindigin berý protsedýralary jeńildetiledi. Salyq bereshegi az bolsa, biznestiń esepshottary buǵattalmaidy. Qaryz somasyna qarai eskertý jáne basqa da sharalar kezeń-kezeńimen qoldanylady.
Kodeks 2026 jylǵy 1 qańtardan bastap kúshine enedi.
