Úkimet 17 iri jobanyń tizimin jasady. Onda tereń óńdeý tásilin meńgerýge basymdyq berilgen. Óz shikizatymyz ben qural-jabdyqtarymyzdy barynsha paidalanyp, iri kásiporyndarǵa japsarlas óndirister ashý mańyzdy.
«Men jaqynda Qaraǵandy oblysynda boldym. Sol kezde Qarmet metallýrgiia kombinatyna bardym. Otandyq investor kelgen soń, ondaǵy ahýal edáýir turaqtalǵan. Kásiporyn jańǵyra bastady. Bul qadam óndiriletin ónim kólemin aitarlyqtai arttyrýǵa tiis. Saran qalasynyń ekonomikasyn ártaraptandyrý jumysy júrgizilip jatyr. Onda avtokólik dońǵalaǵy men turmystyq tehnika shyǵaratyn óndirister iske qosyldy. Sonyń arqasynda bul eldi meken monoqalalar sanatynan shyǵaryldy. Basqa da monoqalalarǵa dem berý úshin osy tájiribeni qoldaný qajet. Jalpy aimaqtardyń ósip-órkendeýine jol ashatyn jańa óndiris oryndaryn barynsha damytý kerek.
Biyl arnaiy Jarlyqpen Alataý qalasy qurylǵanyn bilesizder. Bul qala qarqyndy damityn, innovatsiia keńinen qoldanylatyn ári bilikti mamandar jumys isteitin orynǵa ainalýy qajet. Úkimet onda jaily ómir súrip, tabysty eńbek etýge, investitsiia salýǵa qolaily jaǵdai jasaýǵa tiis.
Avtokólik qurastyrý isinde oń nátijeler bar. Osy qarqyndy saqtap, jergilikti óndiris kólemin udaiy arttyrý kerek. Memlekettiń avtokólik ónerkásibine kórsetip jatqan jan-jaqty qoldaýy túptiń túbinde tolyqqandy avtokólik qurastyrý klasteri retinde eldiń igiligine ainalýy qajet» dedi Memleket basshysy.
