Memleket basshysy Qasym-Jomart Toqaev Abai oblysynyń ákimi Berik Ýálidi qabyldap, óńirdiń áleýmettik-ekonomikalyq damýy jónindegi esepti tyńdady, dep habarlaidy dalanews.kz.
Aqorda málimetinshe, Berik Ýáli Prezidentke 2025 jylǵy áleýmettik-ekonomikalyq damý qorytyndylary men biylǵy tórt aidaǵy negizgi kórsetkishter týraly baiandady.
Ákimniń aitýynsha, ótken jyly oblystyń óńirlik jalpy ónimi 3,9 trln teńgege jetken. Al biylǵy qańtar-sáýir ailarynda qysqa merzimdi ekonomikalyq indikator 103,8 paiyzdy qurady. Osy kezeńde investitsiia kólemi 19,4 paiyzǵa ósip, ónerkásip, óńdeý sektory, aýyl sharýashylyǵy, qurylys jáne kólik salalarynda oń ósim saqtalǵan.
Berik Ýáli investitsiia tartý baǵytynda atqarylǵan jumystar týraly da esep berdi. Onyń málimetinshe, ótken jyldan beri óńirdiń investitsiialyq pýlyna kiretin jobalar sany 29-dan 112-ge deiin ulǵaiǵan. Al josparlanǵan investitsiia kólemi 2,2 trln teńgeden 4,4 trln teńgege deiin artqan.
Óńirde birqatar iri investitsiialyq joba júzege asyrylyp jatyr. Atap aitqanda, quny 577,5 mlrd teńge bolatyn «Aiagóz - Baqty» temirjol jelisi salynyp jatyr. Sonymen qatar Semei qalasynda quny 714 mlrd teńgeni quraityn jańa jylý elektr ortalyǵynyń jáne investitsiia kólemi 255 mlrd teńge bolatyn taý-ken baiytý kombinatynyń qurylysy júrgizilýde.
Kezdesý barysynda arnaiy ekonomikalyq aimaq qurý máselesi de talqylandy. Semei qalasynda qurylýy josparlanǵan aimaqta jalpy quny 400 mlrd teńgeni quraityn óndiristik jobalardy iske asyryp, 2500 jańa jumys ornyn ashý kózdelip otyr. Qazirgi ýaqytta úsh iri joba boiynsha usynystar túsken.
Oblys ákimi Alakól týristik aimaǵyn damytý jumystary týraly da aqparat berdi. Biyl jaǵalaý infraqurylymyn jańǵyrtýǵa 15,4 mlrd teńge bólingen. Onyń ishinde elektr jelilerin tartý jáne Úrjar áýejaiynyń terminalyn qaita jańǵyrtý úshin Arnaýly memlekettik qordan 11,6 mlrd teńge qarastyrylǵan.
Sondai-aq Prezidentke óńirdegi injenerlik infraqurylymdy jańǵyrtý boiynsha qolǵa alynǵan jobalar tanystyryldy. Onyń ishinde sýmen jabdyqtaý, káriz jáne jylý jelilerin jańartý, Semei qalasyndaǵy jańa kópir qurylysyn aiaqtaý, turǵyn úi qurylysy men jol infraqurylymyn damytý máseleleri qamtyldy.
Kezdesý qorytyndysynda Memleket basshysy óńirge investitsiia tartý jumystaryn kúsheitýdi, ekonomikany ártaraptandyrýdy, infraqurylymdy jańǵyrtýdy, halyqtyń turmys sapasyn arttyrýdy jáne «Abaiǵa qurmet» aktsiiasyn joǵary deńgeide ótkizýdi tapsyrdy.
