BQO sotynyń baspasóz qyzmeti málim etkenindei, A.Abýlhairov QR QK 24-baby 3-bóligi - 190-baby 3-bóligi 2-tarmaqshasyna sáikes aiypty dep tanylyp, oǵan paranyń 15 ese eselengen kóleminde 7,5 mln teńge aiyppul salyndy.
Sonymen qatar ol memlekettik qyzmette jáne basqa organdarda laýazymdy qyzmet atqarý quqyǵynan ómir boiyna aiyryldy. Politsiia maiory shenimen de qosh aitysty.
Sot talqysynda málim bolǵanyndai, biylǵy 5 aqpanda Chapaev-Jalpaqtal avtojolynda N.Iavorskii aidap kele jatqan «GAZ-2752» avtokóligi toqtatylǵan. Júrgizýshiden araq isi shyǵyp turǵan ári teksere kelgende, ol kólik júrgizý quqyǵynan aiyrylǵan bolyp shyqty.
N.Iavorskiige qatysty QR QK 346-baby 1-bóligine sáikes qylmystyq is qozǵalyp, tergeý amaldary bastalǵan. Ol meditsinalyq kýálandyrýdan bas tartqannan keiin avtokólik arnaiy turaqqa qoiylyp, ózi Aqjaiyq politsiia bólimine jetkizilgen.
Aýdandyq politsiia bólimi bastyǵynyń orynbasary A.Abýlhairov qyzmet babyn paidalanyp, paida tabý maqsatymen N.Iavorskiige atalǵan qylmystyq is boiynsha belgili bir kólemde syiaqy bergen jaǵdaida oń sheshim shyǵarýǵa múmkindik bar ekendigin jetkizgen. Sosyn isti qarap jatqan tergeýshi M.Orynǵaliulyna júrgizýshiniń qanynda alkogol bar ekendigin anyqtaý úshin qan úlgisin alý jóninde aýyzsha nusqaý bergen.
7 aqpanda A.Abýlhairov anyqtaýshy M.Hamzinge qylmystyq is materialdaryn qabyldap, qan úlgisine qatysty sot himiialyq-toksikologiialyq jáne narkologiialyq saraptama taǵaiyndaýdy tapsyrǵan. Keshkisin Abýlhairovtyń talap etýimen Iavorskii onyń kabinetine kelgen. Politsiia qyzmetkeri qylmystyq isti toqtatyp, avtokólikti arnaiy turaqtan alý úshin 500 myń teńge kóleminde para talap etken. Basqa múmkindigi joqtyǵyn sezingen Iavorskii bul zańsyz talapqa kelisken.
Abýlhairov 10 aqpan kúni sot himiialyq-toksikologiialyq saraptamaǵa sáikes Iavorskiidiń qanynda spirt bolmaǵandyqtan, qylmystyq is qysqartylýǵa jatatynyn bile otyryp, bajasy A.Imanǵazievke aiyptalýshymen kezdesip, 500 myń teńgeni alýdy ótingen.
Alaida A.Imanǵaziev kezdesken kezde N.Iavorskii talap etilgen qarjyny jinai almaǵanyn aitqan. Budan keiin de A.Abýlhairov aqsha talap etýin qoimaǵan. 12 aqpan kúni A.Imanǵaziev A.Abýlhairovqa berý úshin N.Iavorskiiden 500 myń teńgeni alyp, BQO boiynsha sybailas jemqorlyqqa qarsy qyzmet qyzmetkerleriniń qolyna túsken.
Osylaisha, A.Abýlhairov qylmystyq oi-áreketin ózine qatysty emes jaǵdailar boiynsha aiaǵyna deiin jetkize almaǵan.
Basty sot talqysynda A.Abýlhairov kinásin moiyndap, bastapqyda aqsha alý oiynda bolmaǵanyn, tek saraptama qorytyndysy shyqqannan keiin Iavorskiidi aldaýǵa bekingenin jetkizdi.
