بقو سوتىنىڭ باسپا ءسوز قىزمەتى ءمالىم ەتكەنىندەي، ا.ابۋلحايروۆ ق ر قك 24-بابى 3-بولىگى - 190-بابى 3-بولىگى 2-تارماقشاسىنا سايكەس ايىپتى دەپ تانىلىپ، وعان پارانىڭ 15 ەسە ەسەلەنگەن كولەمىندە 7،5 ملن تەڭگە ايىپپۇل سالىندى.
سونىمەن قاتار ول مەملەكەتتىك قىزمەتتە جانە باسقا ورگانداردا لاۋازىمدى قىزمەت اتقارۋ قۇقىعىنان ءومىر بويىنا ايىرىلدى. پوليسيا مايورى شەنىمەن دە قوش ايتىستى.
سوت تالقىسىندا ءمالىم بولعانىنداي، بيىلعى 5 اقپاندا چاپايەۆ-جالپاقتال اۆتوجولىندا ن.ياۆورسكيي ايداپ كەلە جاتقان «گاز-2752» اۆتوكولىگى توقتاتىلعان. جۇرگىزۋشىدەن اراق ءيسى شىعىپ تۇرعان ءارى تەكسەرە كەلگەندە، ول كولىك جۇرگىزۋ قۇقىعىنان ايىرىلعان بولىپ شىقتى.
ن.ياۆورسكييگە قاتىستى ق ر قك 346-بابى 1-بولىگىنە سايكەس قىلمىستىق ءىس قوزعالىپ، تەرگەۋ امالدارى باستالعان. ول مەديسينالىق كۋالاندىرۋدان باس تارتقاننان كەيىن اۆتوكولىك ارنايى تۇراققا قويىلىپ، ءوزى اقجايىق پوليسيا بولىمىنە جەتكىزىلگەن.
اۋداندىق پوليسيا ءبولىمى باستىعىنىڭ ورىنباسارى ا.ابۋلحايروۆ قىزمەت بابىن پايدالانىپ، پايدا تابۋ ماقساتىمەن ن.ياۆورسكييگە اتالعان قىلمىستىق ءىس بويىنشا بەلگىلى ءبىر كولەمدە سىياقى بەرگەن جاعدايدا وڭ شەشىم شىعارۋعا مۇمكىندىك بار ەكەندىگىن جەتكىزگەن. سوسىن ءىستى قاراپ جاتقان تەرگەۋشى م.ورىنعاليۇلىنا جۇرگىزۋشىنىڭ قانىندا الكوگول بار ەكەندىگىن انىقتاۋ ءۇشىن قان ۇلگىسىن الۋ جونىندە اۋىزشا نۇسقاۋ بەرگەن.
7 اقپاندا ا.ابۋلحايروۆ انىقتاۋشى م.حامزينگە قىلمىستىق ءىس ماتەريالدارىن قابىلداپ، قان ۇلگىسىنە قاتىستى سوت حيميالىق-توكسيكولوگيالىق جانە ناركولوگيالىق ساراپتاما تاعايىنداۋدى تاپسىرعان. كەشكىسىن ابۋلحايروۆتىڭ تالاپ ەتۋىمەن ياۆورسكيي ونىڭ كابينەتىنە كەلگەن. پوليسيا قىزمەتكەرى قىلمىستىق ءىستى توقتاتىپ، اۆتوكولىكتى ارنايى تۇراقتان الۋ ءۇشىن 500 مىڭ تەڭگە كولەمىندە پارا تالاپ ەتكەن. باسقا مۇمكىندىگى جوقتىعىن سەزىنگەن ياۆورسكيي بۇل زاڭسىز تالاپقا كەلىسكەن.
ابۋلحايروۆ 10 اقپان كۇنى سوت حيميالىق-توكسيكولوگيالىق ساراپتاماعا سايكەس ياۆورسكييدىڭ قانىندا سپيرت بولماعاندىقتان، قىلمىستىق ءىس قىسقارتىلۋعا جاتاتىنىن بىلە وتىرىپ، باجاسى ا.يمانعازييەۆكە ايىپتالۋشىمەن كەزدەسىپ، 500 مىڭ تەڭگەنى الۋدى وتىنگەن.
الايدا ا.يمانعازييەۆ كەزدەسكەن كەزدە ن.ياۆورسكيي تالاپ ەتىلگەن قارجىنى جيناي الماعانىن ايتقان. بۇدان كەيىن دە ا.ابۋلحايروۆ اقشا تالاپ ەتۋىن قويماعان. 12 اقپان كۇنى ا.يمانعازييەۆ ا.ابۋلحايروۆقا بەرۋ ءۇشىن ن.ياۆورسكييدەن 500 مىڭ تەڭگەنى الىپ، بقو بويىنشا سىبايلاس جەمقورلىققا قارسى قىزمەت قىزمەتكەرلەرىنىڭ قولىنا تۇسكەن.
وسىلايشا، ا.ابۋلحايروۆ قىلمىستىق وي-ارەكەتىن وزىنە قاتىستى ەمەس جاعدايلار بويىنشا اياعىنا دەيىن جەتكىزە الماعان.
باستى سوت تالقىسىندا ا.ابۋلحايروۆ كىناسىن مويىنداپ، باستاپقىدا اقشا الۋ ويىندا بولماعانىن، تەك ساراپتاما قورىتىندىسى شىققاننان كەيىن ياۆورسكييدى الداۋعا بەكىنگەنىن جەتكىزدى.
