Petropavl qalasynyń turǵyny kámeletke tolmaǵan balasyna birneshe jyl boiy aliment tóleýden jaltaryp kelgeni úshin bas bostandyǵynan aiyryldy. Onyń qaryzy 1,5 million teńgeden asqan, dep habarlaidy dalanews.kz.
Sot málimetinshe, er adam sot sheshimimen ulyn asyraýǵa aliment tóleýge mindettelgen. Alaida jumys isteýge jáne tabys tabýǵa múmkindigi bola tura, resmi jumysqa ornalaspaǵan, halyqty jumyspen qamtý ortalyǵyna da júginbegen. Sonyń saldarynan aliment boiynsha bereshegi 1,5 million teńgeden asyp ketken.
Jaza taǵaiyndaý kezinde sot aiyptalýshynyń kinásin moiyndap, jasaǵan isine ókingenin eskergen. Sonymen qatar onyń buryn aliment tólemegeni úshin birneshe ret ákimshilik jaýapkershilikke tartylǵany, al osyǵan deiin Qylmystyq kodekstiń 139-baby boiynsha taraptardyń tatýlasýyna bailanysty qylmystyq jaýaptylyqtan bosatylǵany nazarǵa alynǵan.
"Sottalýshyǵa óz áreketin túzetýge múmkindik berilgenimen, ol tiisti qorytyndy shyǵarmaǵan. Budan bólek, 2021 jyldan beri ulymen bailanys ornatpaǵan, onyń tárbiesine qatyspaǵan ári densaýlyǵy men taǵdyryna qyzyǵýshylyq tanytpaǵany anyqtaldy. Osyǵan bailanysty sot ony kámeletke tolmaǵan balany asyraýǵa qarajat tóleý mindetin oryndamaǵany úshin kináli dep tanyp, 1 jylǵa bas bostandyǵynan aiyrý jazasyn taǵaiyndady", - dep habarlady sot.
Sot úkimi zańdy kúshine endi.
