Oqý-aǵartý ministri Juldyz Súleimenova muǵalimderdiń ata-analarmen jumys ýaqytynan keiingi qarym-qatynasyna qatysty pikir bildirdi. Ministr Facebook-tegi paraqshasynda jariialaǵan beineúndeýinde muǵalimderge demalýǵa ýaqyt berý mańyzdy ekenin túsindirdi, dep habarlaidy dalanews.kz.
Juldyz Súleimenova ministrlik ata-analar men pedagogterdiń qarym-qatynasyn shektep, ony barynsha azaitýdy kózdemeitinin atap ótti. Onyń aitýynsha, otbasy men mektep arasynda turaqty ári syndarly bailanys qajet. Alaida qarym-qatynas belgili bir erejeler men ózara qurmetke negizdelýi kerek.
"Ózimizdi muǵalimniń ornyna qoiyp kóreiik. Orta eseppen pedagog jumys kúni ishinde alty sabaq ótkizedi jáne birneshe synyppen jumys istep, kún saiyn júzdegen balamen qarym-qatynas jasaidy. Ár sabaqta muǵalim barynsha jinaqy bolýy kerek", - dedi ministr.
Ol sabaq barysynda pedagog jańa materialdy túsindirip, taqtada jumys isteitinin, jazyp, kórsetip, suraqtarǵa jaýap beretinin, tapsyrmalar oryndalýyn baqylap, tártipti qadaǵalaitynyn jáne taqyrypty túsinbegen oqýshylarǵa kómektesetinin aitty.
"Pedagog únemi qozǵalysta bolady, kóbine búkil sabaqty tik turyp ótkizedi. Muǵalimnen ár sabaqta bar kúshin salý talap etiledi. Bir sabaq aiaqtalǵan soń kelesisi bastalady: jańa synyp, jańa balalar, jańa suraqtar jáne, árine, jańa jaýapkershilik", - dep atap ótti Súleimenova.
Súleimenova sabaq aiaqtalǵanymen, muǵalimniń jumys kúni bitpeitinin aitty. Muǵalimder dápterler men baqylaý jumystaryn tekserip, kelesi kúnge daiyndalýy kerek.
Onyń pikirinshe, pedagogterge kúsh jinap, demalýǵa ýaqyt qajet. Bul olardyń kelesi kúni balalarmen tolyqqandy jumys isteýi úshin mańyzdy.
"Muǵalimderimiz kelesi kúni balalardyń aldyna qaitadan sergek, muqiiat, sabyrly ári kásibi kúide kelsin desek, pedagogterge kúsh jinap, demalýǵa múmkindik berýimiz kerek. Sondyqtan ata-analar chattaryna qatysty másele qarym-qatynasqa tyiym salý emes, bul - eń aldymen ózara qurmet máselesi", - dedi Súleimenova.
