Kelisimshartqa qol qoiý rásimine Pavlodar oblysy ákiminiń orynbasary Arystan Qabykenov qatysty. Traktorlardy jinaý Pavlodardyń burynǵy avtobazasynyń alańynda júzege asyrylmaq. Jaqyn ýaqytta kásiporynǵa Qytaidan qurastyrý jelisi jetkiziledi. Qýattylyǵy 300 attyń kúshine teń keletin tehnikanyń alǵashqy legin 2020 jyldyń kúzgi jiyn-terim jumystaryna deiin kópshilikke tanystyrý josparlanǵan.
– Bul jobany úsh kezeńge bólip, júzege asyrýdy josparlap otyrmyz. Qazirgi bazanyń qoldanystaǵy infraqurylymyn paidalana otyryp, jylyna 3000 traktor qurastyrý qolǵa alynady. Jańadan 50 jumys orny qurylady.
Eger bári jospar boiynsha júretin bolsa, 2021 jyly «Pavlodar» arnaiy ekonomikalyq aimaǵynyń aýmaǵynan áldeqaida úlken kásiporyn salýdy bastaimyz. Tiisinshe, 150 jumys orny ashylatyn bolady. Bul kásiporynnyń qýattylyǵy jylyna 30 myń tehnika qurastyrýǵa deiin jetpek.
Bolashaqta atalǵan óndiristi Pavlodar oblysynda birjola damytyp, metall buiymdary men aýyl sharýashylyǵy tehnikalaryna arnalǵan bólshekterdi shyǵarmaqpyz, – deidi «KSW Agrotech» JShS bas direktory Rýstam Ibragimov.
Investorlardyń sózinshe, olardyń traktorlary tek Qazaqstanda ǵana emes, jaqyn shet memleketterde de suranysqa ie bolýy kerek. Olardyń basty artyqshylyǵy – baǵasynda. Pavlodarlyq traktordyń quny shamamen 130-150 myń dollardy quraityn bolady. Al dál osyndai amerikalyq, eýropalyq tehnikalar 500-700 myń dollar turady. Onyń ústine kásiporyn óz traktorlaryn lizingke berýge jáne aýyl sharýashylyǵy ónimderine aiyrbastaýǵa ázir.
Pavlodar oblysy ákiminiń baspasóz qyzmeti
Sýretti túsirgen – Olga Mýzalevskaia
