200-den asa emdelýshi men aýysymyna tekserilýge keletin 100-ge jýyq azamatty qabyldaýǵa múmkindigi bar ortalyqtyń qurylysy aiaqtalýǵa jaqyn. Jumystyń 70 paiyzy jasalynǵan.
Aita ketelik, osynaý zamanaýi úlgidegi onkodispanserdiń qurylysyna 7 mlrd teńge bólingen bolatyn.
«Naqty aitqanda, atalǵan qarajatqa operatsiialyq-reanimatsiialyq, radiatsiialyq jáne patologoanatomiialyq korpýstar, 227 oryndyq statsionar satyp alyndy.
Budan bólek, tekserilýge keletin azamattarǵa arnalǵan emhana, baqylaý-ótkizý pýnkti, meditsinalyq qaldyqtardy kádege jaratý pýnkti, bes avtomashinaǵa arnalǵan kólikjai jáne jylýmen qamtamasyz etetin orynǵa úsh qazandyq ornatyldy.
Merdiger kompaniiasy óz jumysyna jaýapkershilikpen qarap, qurylys jumystaryn joǵary deńgeide júrgizdi. Búgingi tańda merdiger ortalyqty árleý-syrlaý jumystaryn aiaqtap, onkodispanser aýmaǵyn abattandyrýǵa kirisip ketti.
Óńirlik meditsina salasyn jańa deńgeige kóterýge septesetin jáne osy tarapta kómek kútip otyrǵan jandarǵa qol ushyn sozatyn ortalyq merziminen buryn qoldanysqa berilýi múmkin», – deidi osy rette Pavlodar oblystyq qurylys basqarmasy kúrdeli qurylys bóliminiń basshysy Abylai Múshkenov.
Al sala mamandarynyń pikirinshe, osynaý jobanyń nátijesinde óńirdegi meditsinalyq qyzmet kórsetýdiń sapasy kósh ilgerilep, munyń sońy aimaqtaǵy ólim-jitim kórsetkishiniń azaiýyna ári erte bastan júrgiziletin meditsinalyq tekserý jumystarynyń sapalanýyna alyp keledi.
«Eń bastysy, Pavlodar óńirindegi onkologiialyq kómekke muqtaj jandar budan bylai naqty mamandandyrylǵan kómek alady.
Ortalyqqa qajetti meditsinalyq qural-jabdyqtardy satyp alý úshin biýdjetten 2,8 mlrd teńge bólingen bolatyn.
Ortalyqtaǵy emhana bólimsheleriniń dárigerlik kabinetteri sáýlelik, ýltradybystyq jáne magnito-rezonanstyq mazmundaǵy qazirgi zamanǵy diagnostikalyq apparattarmen, sondai-aq ekspress-diagnostika úshin biologiialyq materialdardy endoskopiialyq jáne analitikalyq zertteýlermen jabdyqtalady», – dep atap ótti osy oraida qurylys basqarmasynyń basshysy.
Aita ketelik, statsionardyń birinshi qabatynda klinikalyq-diagnostikalyq zerthanalar, operatsiialyq-reanimatsiialyq korpýstyń ekinshi qabatynda bes beiindi operatsiialyq, úsh narkozdyq, tórt operatsiiaaldy jáne eki apparattyq-monitorly operatsiialyq bólimshe bolady. Úshinshi qabatta reanimatsiia jáne qarqyndy terapiia bólimshesi ornalasady.
