Shúlbi sý qoimasynan Ertis ózeni ekojúiesin saqtaý maqsatynda 6,4 mlrd tekshe metrden asa sý jiberildi, dep habarlaidy dalanews.kz.
Sý jiberý kólemi sekýndyna 3400-3500 tekshe metrge jetip, bul rejim 8 kún boiy saqtalǵan. Qazir Pavlodar oblysy aýmaǵynda Ertis ózeniniń jaiylmasyn sýlandyrý jumystary jalǵasyp jatyr.
Búginde sýlandyrylǵan aýmaq kólemi 257,2 myń gektarǵa jetken. Bul jalpy aýmaqtyń shamamen 76 paiyzyna teń.
Ertis basseini sý inspektsiiasy basshysy Medet Jádigerulynyń aitýynsha, Shúlbi sý qoimasynan tabiǵatty qorǵaý maqsatynda sý jiberý jumystary jyl saiyn júrgiziledi.
Onyń sózinshe, bul sharalar balyqtardyń ýyldyryq shashýyna qolaily jaǵdai jasaý, jaiylma jerlerdi sýlandyrý jáne Pavlodar oblysynyń aýyl sharýashylyǵyna qajet jem-shóp qoryn saqtaý úshin qajet.
