Pavlodarda erkin kúresten tanymal qazaqstandyq balýan, Olimpiada oiyndarynyń qola júldegeri Dáýlet Shabanbaiǵa qatysty rezonansty is boiynsha sot protsesi jalǵasyp jatyr. Sportshy Ulttyq ulannyń áskeri qyzmetshilerinen quralǵan patrýlge shabýyl jasady degen kúdikpen tergeý izoliatoryna qamalǵan, dep habarlaidy Dalanews.kz Tengrinews.kz-ke silteme jasap.
Pavlodardaǵy qylmystyq ister jónindegi aýdanaralyq sotta sot jaryssózi ótti. Ataqty balýanǵa Qylmystyq kodekstiń 380-baby 4-bóliginiń 1-tarmaǵy – «Eki nemese odan da kóp adamǵa qatysty bilik ókiline kúsh qoldaný» boiynsha aiyp taǵylyp otyr.
Is materialdaryna sáikes, biyl qyrkúiek aiynda keshki saǵat toǵyzdar shamasynda Ulttyq ulannyń úsh áskeri qyzmetshisinen quralǵan patrýl Shabanbaidy qalalyq dámhanalardyń biriniń mańynda toqtatqan. Buǵan azamattardyń shaǵymy sebep bolǵan. Málimetke sáikes, mas kúide bolǵan sportshy shý shyǵaryp, ózin agressivti ustaǵan.
Patrýldiń suraqtary men eskertýlerine ol balaǵat sózdermen jaýap berip, keiin bir áskeri qyzmetshini iterip jibergen, nariad basshysyn iyǵynan teýip, bet tusynan urǵan, al úshinshisiniń kózine soqqy tigen. Kómekke kelgen ózge patrýlder kúdiktini jerge jyǵyp, qolyna kisen salǵan.
Sot jaryssózinde memlekettik aiyptaýshy 42 jastaǵy sportshyny ortasha qaýipsizdik deńgeiindegi mekemede tórt jylǵa bas bostandyǵynan aiyrýdy surady.
Qorǵaý tarapy bas bostandyǵynan aiyrýǵa bailanysty emes jaza taǵaiyndaýdy surady. Advokat Dáýlet Shabanbaidyń Qazaqstandy halyqaralyq arenada tanytqan belgili sportshy ekenin, turaqty jumysy, otbasy baryn jáne oń minezdemeleri baryn atap ótti. Qorǵaý pikirinshe, qylmystyq quqyqbuzýshylyq aýyr sanatqa jatqanyna qaramastan, ol aldyn ala josparlanbaǵan, aýyr zardaptarǵa ákelmegen jáne kenetten týyndaǵan emotsiialyq qaqtyǵys saldarynan bolǵan.
Sportshy óz kinásin tolyq moiyndaǵanymen, sot jaryssózinde sóz sóileýden bas tartty.
Eske salaiyq, balýanǵa taǵylǵan baptyń sanktsiiasy boiynsha úsh jyldan jeti jylǵa deiin bostandyǵyn shekteý nemese bas bostandyǵynan aiyrý jazasy qarastyrylǵan.
