پاۆلوداردا ەركىن كۇرەستەن تانىمال قازاقستاندىق بالۋان، وليمپيادا ويىندارىنىڭ قولا جۇلدەگەرى داۋلەت شابانبايعا قاتىستى رەزونانستى ءىس بويىنشا سوت پروسەسى جالعاسىپ جاتىر. سپورتشى ۇلتتىق ۇلاننىڭ اسكەري قىزمەتشىلەرىنەن قۇرالعان پاترۋلگە شابۋىل جاسادى دەگەن كۇدىكپەن تەرگەۋ يزولياتورىنا قامالعان، دەپ حابارلايدى Dalanews.kz Tengrinews.kz-كە سىلتەمە جاساپ.
پاۆلودارداعى قىلمىستىق ىستەر جونىندەگى اۋدانارالىق سوتتا سوت ءجارىسسوزى ءوتتى. اتاقتى بالۋانعا قىلمىستىق كودەكستىڭ 380-بابى 4-بولىگىنىڭ 1-تارماعى – «ەكى نەمەسە ودان دا كوپ ادامعا قاتىستى بيلىك وكىلىنە كۇش قولدانۋ» بويىنشا ايىپ تاعىلىپ وتىر.
ءىس ماتەريالدارىنا سايكەس، بيىل قىركۇيەك ايىندا كەشكى ساعات توعىزدار شاماسىندا ۇلتتىق ۇلاننىڭ ءۇش اسكەري قىزمەتشىسىنەن قۇرالعان پاترۋل شابانبايدى قالالىق ءدامحانالاردىڭ ءبىرىنىڭ ماڭىندا توقتاتقان. بۇعان ازاماتتاردىڭ شاعىمى سەبەپ بولعان. مالىمەتكە سايكەس، ماس كۇيدە بولعان سپورتشى شۋ شىعارىپ، ءوزىن اگرەسسيۆتى ۇستاعان.
ءپاترۋلدىڭ سۇراقتارى مەن ەسكەرتۋلەرىنە ول بالاعات سوزدەرمەن جاۋاپ بەرىپ، كەيىن ءبىر اسكەري قىزمەتشىنى يتەرىپ جىبەرگەن، نارياد باسشىسىن يىعىنان تەۋىپ، بەت تۇسىنان ۇرعان، ال ءۇشىنشىسىنىڭ كوزىنە سوققى تيگەن. كومەككە كەلگەن وزگە پاترۋلدەر كۇدىكتىنى جەرگە جىعىپ، قولىنا كىسەن سالعان.
سوت جارىسسوزىندە مەملەكەتتىك ايىپتاۋشى 42 جاستاعى سپورتشىنى ورتاشا قاۋىپسىزدىك دەڭگەيىندەگى مەكەمەدە ءتورت جىلعا باس بوستاندىعىنان ايىرۋدى سۇرادى.
قورعاۋ تاراپى باس بوستاندىعىنان ايىرۋعا بايلانىستى ەمەس جازا تاعايىنداۋدى سۇرادى. ادۆوكات داۋلەت شابانبايدىڭ قازاقستاندى حالىقارالىق ارەنادا تانىتقان بەلگىلى سپورتشى ەكەنىن، تۇراقتى جۇمىسى، وتباسى بارىن جانە وڭ مىنەزدەمەلەرى بارىن اتاپ ءوتتى. قورعاۋ پىكىرىنشە، قىلمىستىق قۇقىقبۇزۋشىلىق اۋىر ساناتقا جاتقانىنا قاراماستان، ول الدىن الا جوسپارلانباعان، اۋىر زارداپتارعا اكەلمەگەن جانە كەنەتتەن تۋىنداعان ەموسيالىق قاقتىعىس سالدارىنان بولعان.
سپورتشى ءوز كىناسىن تولىق مويىنداعانىمەن، سوت جارىسسوزىندە ءسوز سويلەۋدەن باس تارتتى.
ەسكە سالايىق، بالۋانعا تاعىلعان باپتىڭ سانكسياسى بويىنشا ءۇش جىلدان جەتى جىلعا دەيىن بوستاندىعىن شەكتەۋ نەمەسە باس بوستاندىعىنان ايىرۋ جازاسى قاراستىرىلعان.
