Áleýmettik jelide Pavlodar oblysy Qoiandy aýyldyq okrýginiń ákimi Erjan Orazálimov pen jergilikti feldsher arasynda bolǵan oqiǵa qyzý talqyǵa tústi. Keibir aqparat kózderinde ákimniń feldsherge qol kóterip, zardap shekken adamnyń miy shaiqalǵany aitylǵan, dep habarlaidy Dalanews.kz.
Pavlodar oblystyq politsiia departamenti bul derekke qatysty resmi málimdeme jasady.
“Janjal keshki ýaqytta, olardyń qyzmettik mindetterine qatysy joq jaǵdaida, ortaq sharaǵa qatysý kezinde bolǵan. Oqiǵa turmystyq sipatqa ie jáne kásibi qyzmetine bailanysty emes. Qatysýshylar ózara tatýlasty, bir-birine aryz-shaǵymdary joq”, – delingen vedomstvo habarlamasynda.
Eske salaiyq, buǵan deiin "Úzdik ákim" atanǵan Aqtóbe oblysy Qandyaǵash qalasynyń ákimi Qazbek Aqqaiyrǵa balabaqsha qyzmetkerin urdy degen aiyp taǵylǵan edi.
Sotta daýly is qaraldy.
Tergeý materialdaryna sáikes, ótken jyldyń sońynda 39 jastaǵy ákim jergilikti balabaqshanyń tárbieshisin uryp-soǵyp, basyna jáne betine birneshe soqqy jasaǵan. Sondai-aq, oqiǵa kezinde balaǵat sózder aitqany da kórsetilgen. Dárigerler jábirlenýshige «mi shaiqalýy» degen diagnoz qoiǵan.
Zardap shekken tárbieshi óziniń ákimmen jaqyn qarym-qatynasta bolǵanyn aitqan. Alaida Qazbek Aqqaiyr bul aiyptaýlardyń barlyǵyn joqqa shyǵaryp otyr.
Bul ákimniń aty birinshi ret daý-damaiǵa ilikken joq. Biyldyń ózinde Ádep jónindegi keńes oǵan eki ret tártiptik jaza qoldanǵan. Sondai-aq, turǵyndarmen dóreki sóilegeni úshin de birneshe shaǵym túsken.
Aita keteiik, Qazbek Aqqaiyr 2020 jyly respýblikalyq "Úzdik aýyl ákimi" baiqaýynda jeńimpaz atanǵan bolatyn.
